Dharashiv News : दोन्ही जिल्ह्यांमध्ये मागील सहा दिवसांपासून पाऊस हजेरी लावत असला तरी अद्याप पेरणीसाठी योग्य पाऊस झालेला नाही. रविवारी (ता. ९) सायंकाळी दोन्ही जिल्ह्यांत दमदार पावसाने सर्वदूर हजेरी लावली.

मात्र, पेरणीसाठी आणखी मोठ्या पावसाची प्रतीक्षा शेतकऱ्यांना आहे. मागील काही दिवसांत पाऊस पडूनही जमिनीत पेरणीसाठी आवश्यक खोलीपर्यंत ओल झालेली नसल्याचे शेतकरी सांगत आहेत. यंदा कडक उन्हाळा होता. त्यामुळे जमिनी मोठ्या प्रमाणात तापली होती. तापलेल्या जमिनीसाठी दमदार पावसाची प्रतीक्षा शेतकऱ्यांना आहे.

यंदा अवकाळी पावसाने कमीअधिक प्रमाणात दोन्ही जिल्ह्यात चांगलीच हजेरी लावली. नाल्यांना पाणी येईपर्यंत पाऊस पडला. मात्र, दुसरीकडे कडक ऊन्हाळा कायम होता. कडाक्याच्या उन्हात पडलेला पाऊस नामशेष झाला. पावसाळा सुरू झाल्यानंतरही हिच परिस्थिती आहे. कडक ऊन असल्याने पडलेल्या पावसाचा परिणाम दिसून येत नाही.

दोन दिवसांत पाऊस सलग हजेरी लावत असला तरी पेरणीसाठी तो समाधानकारक नसल्याने शेतकऱ्यांनी अजून चाड्यावर मूठ धरलेली नाही. दरवर्षीच्या तुलनेत उन्हाची तीव्रता वाढत असून उन्हामुळे तापलेली जमिन आतापर्यंतच्या पावसाने अजून थंडच झाली नसल्याचे शेतकरी सांगत आहेत.

धाराशिवला आतापर्यंत ७७ मिमी पाऊस

धाराशिव जिल्ह्यात रविवारी सायंकाळी १५.६ मिलिमीटर पाऊस झाला. जिल्ह्यातील सर्वच तालुक्यात पावसाने हजेरी लावली. यात सर्वाधिक पाऊस तुळजापूर तालुक्यात झाला. जिल्ह्यात आतापर्यंत सरासरी ७७.७ मिमी पाऊस झाला आहे. जिल्ह्यात तालुकानिहाय रविवारी (ता. ९) पडलेला पाऊस व कंसात आतापर्यंत पडलेला पाऊस पुढीलप्रमाणे ः धाराशिव - १४.६ (५५.७), तुळजापूर - २८.३ (१००.४), परंडा - १५ (८६.४), भूम - १६.६ (८७.८), कळंब - ७.८ ( ४१), उमरगा - १४.३ (१०३.९), लोहारा - ५.७ (६६.२), वाशी - १३.३ (९२.२)