Sugarcane Farmer : आसुर्ले पोर्ले येथील दालमिया साखर कारखान्याकडून ऊस उत्पादक शेतकऱ्यांच्या खात्यात उसाचे बील थेट जमा केले जात आहे. यामुळे शेतकऱ्यांनी सोसायटीतून घेतलेल्या कर्जाची रक्कम कट होत नसल्याने विकास सेवा संस्थांची अडचण होत असल्याचे दिसून येत आहे.

दरम्यान याबाबत कारखाना कार्यक्षेत्रातील विकास सेवा संस्थांनी याबाबत आवाज उठवला आहे. कारखान्याच्या धोरणाविराधात निवेदन तयार करत करवीर तालुक्यातील अनेक विकास संस्थांनी, माजी मंत्री सतेज पाटील, जिल्हा बँकेचे व्यवस्थापकीय संचालक व दालमिया शुगरच्या प्रशासनास दिले.

निवेदनात म्हटले आहे की, ऊस पिकवताना उत्पादक शेतकऱ्यांना अनेक अडचणी असतात. अशा परिस्थितीत शेतकऱ्यांना कर्ज स्वरूपात पैसे, विविध शासकीय योजनांचा लाभ खते, पाणीपुरवठा, आदी गरजा विकास सेवा संस्था देत असतात.

मोबदल्यात जिल्हा बँकेच्या माध्यमातून विकास संस्था आपली वसुली करून उर्वरित रक्कम शेतकऱ्यांना देत असतात; पण कारखान्यांनी थेट शेतकऱ्यांच्या खात्यात रक्कम जमा केल्यास विकास संस्था वसुलीअभावी अडचणीत येण्याची शक्यता आहे.

या पार्श्वभूमीवर निगवे दुमाला, शिये, भुये, भुयेवाडी, केर्ली, केलें, वरणगे, वडणगे, कुशिरे पोहाळे आदी गावातील विकास सेवा संस्थेच्या पदाधिकाच्यानी एकत्र येऊन यासंदर्भात माजी मंत्री सतेज पाटील व जिल्हा बँकेचे व्यवस्थापकीय संचालक यांची भेट घेऊन त्यांना याबाबतचे निवेदन दिले. तसेच कारखाना प्रशासनास निवेदन दिले.

पूर्वीप्रमाणे सात दिवसांत ही रक्कम जिल्हा बँक आणि विकास संस्थेच्या माध्यमातून शेतकऱ्यांच्या खात्यात जमा करण्याचा आग्रह धरला. तसे न झाल्यास विकास संस्था आंदोलन उभे करून कारखाना बंद पाडतील, असा इशारा शिष्टमंडळाने दिला.

यावेळी जय हिंद विकास सेवा संस्थेचे बाळासाहेब शिरोळकर, हनुमान विकास संस्थांचे जयसिंग काशीद, प्रकाश पाटील, शिवाजी कुशीरकर, मारुती उतरेकर आदी संचालक उपस्थित होते.