Baramati News : ‘‘या परिसरातील शेतकऱ्यांची मागणी विचारात घेता बारामतीत पशुवैद्यकीय महाविद्यालयाची मागणी पूर्ण करण्यासाठी राज्य शासन सकारात्मक निर्णय घेईल,’’ अशी ग्वाही पशुसंवर्धनमंत्री पंकजा मुंडे यांनी दिली.

बारामतीत गुरुवारी (ता. १६) ‘कृषिक-२०२५’ प्रदर्शनाच्या उद्‌घाटनप्रसंगी त्या बोलत होत्या. पंकजा मुंडे म्हणाल्या, ‘‘बारामतीत सर्वच सुविधा झाल्या आहेत, मात्र या परिसरातील शेतकऱ्यांच्या पशुधनाच्या सुदृढ आरोग्यासाठी बारामतीत उत्तम दर्जाचा पशुवैद्यकीय महाविद्यालयाची गरज आहे. स्वतः उपमुख्यमंत्री अजित पवार यांनीही ही गरज बोलून दाखवली आहे, असा प्रस्ताव आल्यास आम्ही त्याला तातडीने मंजुरी देऊ.’’

दरम्यान, अजित पवार म्हणाले, की बारामती व परळीसाठी पशुवैद्यकीय महाविद्यालयाचा प्रस्ताव सादर करा त्याला मी अर्थमंत्री म्हणून मान्यता देतो, असे सांगत बारामतीसोबतच परळीलाही असा पशुवैद्यकीय महाविद्यालय सुरू करण्याचे पंकजा मुंडे यांना सुचविले. यामुळे आता बारामती व परळीतही पशुवैद्यकीय महाविद्यालय लवकरच साकारणार हे स्पष्ट झाले आहे.

‘खुल्या जागा महिला बचत गट, शेतकऱ्यांना द्याव्यात’

या कार्यक्रमात कृषिमंत्री माणिकराव कोकाटे यांनी अजित पवार यांच्याकडे राज्यात उपलब्ध असलेल्या शहरातील खुल्या जागा (ओपन स्पेस) काही ठिकाणी महिला बचत गट व शेतकऱ्यांना शेतीमालाची विक्री करण्यासाठी आरक्षित कराव्यात अशी मागणी केली. आठवडेबाजारात भरडधान्य विक्रीसाठीही हक्काची जागा असावी, असे ते म्हणाले.