Sindhudurg News : हत्तींना रोखण्यासाठी विविध उपाय निष्क्रिय ठरल्यानंतर आता वन विभागाने हत्ती जंगलातच थांबावे याकरिता जंगलातच ऊसरूपी खाद्य पुरविण्याची योजना आखली आहे.

केर, मोर्ले परिसरात असलेल्या हत्तींना सध्या प्रतिदिन २५० किलो ऊस खाद्यासाठी घातला जात आहे. त्याचा काही अंशी उपयोग होत असल्याचा दावा वन विभागाने केला आहे.

तिलारी खोऱ्यातील अनेक गावांमध्ये हत्तींचा उपद्रव सुरू आहे. ‘हत्ती हटाव’सह विविध उपाय वन विभागामार्फत राबविण्यात आले. परंतु त्याचा तितकासा उपयोग झाला नाही. नुकसानग्रस्तांना मदत देण्याशिवाय कोणताही सक्षम पर्याय राहिलेला नाही.

जिल्ह्यातील केर, मोर्ले (ता. दोडामार्ग) येथे सध्या हत्तींचा मुक्काम असून त्यांच्याकडून शेती, बागायतीचे नुकसान सुरू आहे.

गेल्या काही दिवसांत तर हत्ती वस्तीपर्यंत आल्याचा अनुभव अनेकांनी घेतला आहे. त्यामुळे आम्हाला नुकसानीची मदत नको पण हत्तींना रोखा, अशी मागणी सातत्याने शेतकऱ्यांकडून वन विभागाकडे होत होती.

त्याची दखल घेत आता वन विभागाने हत्तींना पुरेसे खाद्य जंगलातच उपलब्ध करून दिले तर ते तेथेच थांबतील या हेतूने केर, मोर्ले भागात असलेल्या हत्तींना खाद्य देण्याची योजना हाती घेतली आहे.

गेल्या तीन दिवसांपासून केर, मोर्लेत ज्या भागात हत्तींचा वावर आहे, तेथे वन विभागाच्या क्षेत्रात ऊस खाद्य म्हणून ठेवला जात आहे. प्रतिदिन सुमारे २५० किलो ऊस ठेवला जात आहे.

वन विभागाच्या या उपायानतंर गेल्या तीन दिवसांत हत्ती वस्तीत येऊन शेती नुकसान केल्याचा प्रकार घडलेला नाही.