Buldhana News: सध्या जनावरांमध्ये लम्पी त्वचा आजाराचा प्रादुर्भाव वेगाने वाढताना दिसत आहे. यामुळे जिल्ह्यातील पशुपालकांमध्ये चिंतेचे वातावरण आहे. लम्पी आजाराचे वाढते प्रमाण लक्षात घेता बुलडाणा कृषी विज्ञान केंद्राने पशुतज्ज्ञांच्या सल्ल्याने वेळेवर उपाययोजना करण्याचे आवाहन केले आहे.

लम्पी त्वचा आजार विषाणूजन्य आहे. आजाराचा संसर्ग चावणारे कीटक तसेच संक्रमित जनावरांच्या संपर्कातून पसरतो. उष्ण आणि दमट हवामानात आजाराचा प्रसार अधिक प्रमाणात होतो. आजारी जनावरांना ताप येतो, दूध उत्पादन कमी होते, डोळ्यांतून पाणी, लसिका ग्रंथीना सूज येते. डोके, मान, पायांवर १० ते ५० मिमी व्यासाच्या गाठी येतात.

फुप्फुसाचा दाह, कासदाह, गर्भपात आणि प्रजनन क्षमतेत घट, पांढऱ्या रक्त पेशींची संख्या कमी होणे, अशी प्रमुख लक्षणे दिसून येतात. पशूतज्ज्ञांच्या सल्ल्याने प्रतिजैविके, ज्वरनाशक, आणि जीवनसत्त्व देणे आवश्यक आहे, अशी माहिती बुलडाणा येथील कृषी विज्ञान केंद्राचे पशुसंवर्धन आणि दुग्धशास्त्रज्ञ डॉ. नरेंद्रकुमार देशमुख यांनी दिली.

राष्ट्रीय डेअरी विकास बोर्डाने सुचविलेल्या उपाययोजना 

१० खाऊची पाने, १० ग्रॅम मिरी, १० ग्रॅम मीठ याची पेस्ट बनवून त्यामध्ये थोडा गूळ मिसळावा. ही पेस्ट जनावरांना पहिल्या दिवशी दर तीन तासाला आणि दुसऱ्या दिवशीपासून दिवसाकाठी तीनवेळा पंधरा दिवस द्यावी.जखमांमध्ये किडे पडत असतील तर खोबरेल तेलामध्ये कापूर मिसळून जखमेमध्ये लावावे. किडे असलेल्या जखमांवर सीताफळाची पाने बारीक करून लावावीत.