Jalgaon News : हवामानावर आधारित फळ पीकविमा योजनेअंतर्गत जिल्ह्यातील सुमारे ८१ हजार केळी उत्पादक शेतकऱ्यांनी फळ पीकविमा काढला होता. मात्र अद्यापपर्यंत निम्म्यापेक्षा जास्त शेतकऱ्यांना या विम्याची रक्कम मिळालेली नाही.

परतावा मिळत नाही तोपर्यंत गावात कुठल्याही पुढारी, लोकप्रतिनिधी, नेत्यास प्रवेश दिला जाणार नाही, असा निर्णय तांदलवाडी (ता. रावेर, जि. जळगाव) येथील विमाधारक केळी उत्पादकांनी घेतला आहे.

सप्टेंबरपर्यंत ही रक्कम शेतकऱ्यांना मिळणे अपेक्षित होते. मात्र विमा कंपनीकडून मनमानी कारभार सुरू आहे. रावेर, मुक्ताईनगर परिसरातील १० ते १५ हजार शेतकऱ्यांना या नुकसानीची रक्कम अद्यापही मिळाली नाही, असा संताप शेतकऱ्यांनी व्यक्त केला आहे.

या प्रकरणी राजकीय पदाधिकारी, तक्रार निवारण समिती, प्रशासन व विमा कंपनीदेखील दुर्लक्ष करीत आहे. त्यामुळे या विम्यापासून वंचित शेतकऱ्यांनी नुकतीच बैठक घेतली. ‘‘मुख्यमंत्री, कृषिमंत्र्यांबरोबर बैठक घेऊन मार्ग काढू,’’ असे आमदार चंद्रकांत पाटील म्हणाले.