Latur / Dharashiv News : दोन्ही जिल्ह्यांत मागील दोन दिवसांपासून अवकाळी पावसाने हजेरी लावली आहे. गुरुवारी (ता. तीन) सायंकाळी पावसाने कहरच केला. मेघगर्जना व वादळी वाऱ्यासह झालेल्या पावसाने रब्बीतील ज्वारी व गहू पिकांना फटका बसला. काही भागात काढणीला आलेली ज्वारी भुईसपाट झाली तर गहू व कांद्याचे नुकसान झाले.

द्राक्षासह अन्य फळबागांनाही पावसाचा फटका बसला. वादळी वाऱ्याने आंब्याचे मोठे नुकसान झाले. झाडाखाली कैऱ्यांचा सडा पडला. ढगाळ वातावरणाने उकाड्यात प्रचंड वाढ झाली असताना दुसरीकडे वीजपुरवठा खंडित झाल्याने नागरिक हैराण झाले.

दोन दिवसांपासून जिल्ह्यात वातावरण बदलले असून उकाड्यात प्रचंड वाढ झाली आहे. यावरून हवामान विभागाने अवकाळी पावसाचा अंदाज वर्तवला होता. तो तंतोतंत खरा ठरला. बुधवारपासूनच (ता. दोन) ढगाळ वातावरण होऊन उकाडा वाढला.

बुधवारी काही भागात वादळी वाऱ्यासह पाऊस झाला. याचा फटका आंबा फळाला बसला. वाऱ्यामुळे आंब्याच्या कैऱ्यांचा सडा पडला. गुरुवारी काही भागात दिवसभर ऊन तर काही भागात ढगाळ वातावरण होते. दुपारनंतर वातावरणात बदल होऊन वादळी वारा व मेघगर्जनेसह पावसाला सुरुवात झाली. काही भागात अर्धा तास तर काही भागात तासभर पावसाने धुमाकूळ घातला.

लातूर शहरात अर्धातासाचे पावसामुळे सखल भागात पाणी साचले. यासोबत तुंबलेल्या नाल्यांतील पाणी रस्त्यावर येऊन दुर्गंधी पसरली. बाजारात आलेल्या नागरिकांची धावपळ उडाली. काही भागात वीजपुरवठा खंडित झाल्याने नागरिक वैतागून गेले. निलंगा तालुका व काही भागात ज्वारीचे पीक आडवे झाले.

काढणीला आलेला गहू व कांद्याचेही नुकसान झाल्याचे शेतकऱ्यांनी सांगितले. लातूर जिल्ह्यात निलंगा, औसा, अहमदपूर, शिरूर अनंतपाळ व लातूर तालुक्यांत पावसाने हजेरी लावली. धाराशिव जिल्ह्यात द्राक्ष व आंब्याच्या फळबागांना पावसाचा फटका बसला. उमरगा, लोहारा, भूम, परांडा व वाशी तालुक्याला पावसाने झोडपले. पाऊस कमी आणि वारा जास्त असल्यामुळे आंबे गळून पडले. उमरग्यातील जुनी पेठेतील झाडावर वीज कोसळली.