Amaravati News : संत्रा उत्पादनात मृग बहर अत्यंत महत्त्वाचा समजला जातो. त्याकरिता मे तसेच जून महिन्यात बाग ताणावर सोडली जाते. यंदा मात्र या महिन्यात झालेल्या पावसामुळे बागांचा ताण तुटला. त्यामुळे या वर्षी मृग बहरात फळधारणा होण्याची शक्‍यता नाही. त्याची दखल घेत संत्रा बागायतदारांना भरपाई मिळावी, अशी मागणी ‘महाऑरेंज’ने केली आहे.

अमरावती जिल्हाधिकारी आशिष येरेकर यांच्या मार्फत शासनाला निवेदन पाठविण्यात आले. त्यानुसार, राज्यात दीड लाख हेक्‍टरवर, तर विदर्भात सुमारे १ लाख २५ हजार हेक्‍टरवर संत्रा लागवड आहे. त्यातील सर्वाधिक एक लाख हेक्‍टर क्षेत्रावरील लागवड ही एकट्या अमरावती जिल्ह्यात आहे.

दर्जेदार रोपांचा अभाव, व्यवस्थापनातील त्रुटी या सर्व कारणांमुळे महाराष्ट्राची उत्पादकता मात्र देशातील इतर राज्यांच्या तुलनेत सर्वांत कमी आहे. मृग बहराचे सुमारे पाच लाख टन उत्पादन होते. परंतु संत्रा पट्ट्यात गेल्या काही वर्षांत बागायतदार संत्रा गळतीच्या समस्येला सामोरे जात आहेत. बुरशीजन्य रोगांचा वाढता प्रादुर्भाव हे कारण त्यामागे दिले जाते.

याचा परिणाम संत्रापट्टयातील अर्थकारणावर झाला असतानाच आता अनिश्‍चित पावसामुळे देखील मृग बहर धोक्‍यात आला आहे. मृग बहर घेण्यासाठी शेतकरी मे व जून महिन्यात बाग ताणावर सोडतात. त्यानंतर पावसाच्या पाणी बरसल्यावर हा ताण तुटतो. यंदा मात्र मे महिन्यातच अवकाळी पावसाने हजेरी लावली.

त्यामुळे मृग बहराचा ताण तुटला आणि आता फळधारणा होणारच नाही अशी स्थिती आहे. त्याची दखल घेत शासनाने संत्रा बागांचे सर्व्हेक्षण व पंचनामे करून भरपाई द्यावी, अशी मागणी महाऑरेंजचे कार्यकारी संचालक श्रीधर ठाकरे यांनी केली आहे.

अमरावतीसोबतच अकोला, वाशीम, बुलडाणा तसेच नागपूर या जिल्ह्यांत देखील संत्रा पिकाखालील क्षेत्र वाढते आहे. या भागातील बागायतदारांना देखील नुकसान सोसावे लागले. त्याची दखल घेत भरपाई मिळावी, अशी मागणी केली आहे.