Nashik News: यंदा मे महिन्यापासून पावसाने हजेरी लावली. त्यानंतर जूनमध्ये जोर धरलेला पाऊस अद्यापही थांबायला तयार नसल्याने शेतकरी अडचणीत सापडला आहे. परिणामी सिन्नर तालुक्यातील पश्चिम भाग ओल्या दुष्काळाच्या सावटाखाली आहे. सिन्नर-घोटी रस्त्यापासून पुढे थेट समृद्धी महामार्गापर्यंत भाजीपाला उत्पादकांचे कोट्यवधी रुपयांचे नुकसान झाल्याची स्थिती आहे.

गेल्या दोन महिन्यांपासून कोसळणाऱ्या पावसामुळे जमिनी उपळल्या असून भाजीपाला उत्पादक पट्टा उद्ध्वस्त झाला आहे. गेल्या दोन महिन्यांत सरासरीच्या तुलनेत जास्त पाऊस झाला आहे. एकीकडे एप्रिल व मे महिन्यात शेतकऱ्यांनी दुष्काळाच्या तीव्र झळा सोसल्या. अशा प्रतिकूल परिस्थितीत उन्हाळी भाजीपाला लागवडी केलेल्या होत्या.

मात्र मे महिन्यापासूनच पावसाने दणका देण्यास सुरुवात केल्याने शेतकऱ्यांसमोर मोठे संकट आ वासून उभे राहिले आहे. पश्चिम पट्ट्यातील वडगाव, सोनांबे, कोनांबे, डुबेरे, लोणारवाडी, सोनारी, डुबेरवाडी, पाडळी, पांढुर्ली, शिवडा ठाणगाव, या भागांत भाजीपाला लागवडी मोठ्या प्रमाणावर असतात.

मात्र पावसाने अडचणी वाढविल्या. यात प्रामुख्याने हजारो हेक्टरवर टोमॅटो, कोबी, वाटाणा व पालेभाज्या पिकांचे अतोनात नुकसान झाले आहे. शेत उपळल्याने सोयाबीन, मका पिके पाण्यातच आहेत. त्यामुळे ओल्या दुष्काळात तेरावा महिना अशीच परिस्थिती असल्याचे शेतकरी सांगतात.

हंगाम संपण्यापूर्वीच टोमॅटो हंगामाचा ‘द एन्ड’

‘‘उन्हाळ्यात २० गुंठे टोमॅटो लागवड केली. आत्तापर्यंत टोमॅटोचे १० ते १२ खुडे झाले असते. त्यातून ५०० क्रेट उत्पादन अपेक्षित होते. मात्र लागवड खराब झाल्याने दुसरा खुडा कसाबसा झाला. त्यातून अवघे २५ क्रेट टोमॅटो उत्पादन हाती आले. खर्चसुद्धा निघालेला नाही,’’ अशी परिस्थिती भाजीपाला उत्पादक शेतकरी संपत गीते यांनी सांगितले.