Akola News : यंदाच्या खरीप हंगामात लागवड केलेले तुरीचे पीकही आता अवकाळी पाऊस, धुक्याच्या वातावरणामुळे अडचणीत सापडले आहे. अकोला, बुलडाणा, वाशीम जिल्ह्यांमध्ये गेल्या तीन दिवसांपासून मॉन्सूनोत्तर पाऊस होत आहे. त्यामुळे शेतांमध्ये उभे असलेले तुरीचे पीक जमिनीवर लोळले. तर, वेचणीला आलेला कापूस ओला झाल्याने मोठे नुकसान शेतकऱ्यांना सहन करावे लागत आहे.

या अवकाळी पावसामुळे आधीचा तुरीचा फुलोरा अनेक ठिकाणी गळून पडला. तुरीच्या झाडावर लागलेल्या शेंगाही तूटून पडल्या. वादळी वारा व पावसाने तूर कोसळली आहे. हा सर्व प्रकार तुरीच्या पिकासाठी मारक मानला जात आहे. त्यामुळे उत्पादनावर परिणाम होऊ शकतो, अशी चिंता शेतकरी व्यक्त करीत आहेत.

आता गेल्या तीन दिवसांत सातत्याने पावसाचे वातावरण बनलेले असून रात्री पाऊस व दिवसा धुके पडलेले राहते. पहाटेपासून शेतशिवारात धुके पडत आहे. दुपारपर्यंत हे वातावरण कायम असते. सतत ढगाळ वातावरण तयार झाल्याने तुरीला आलेला फुलोर व शेंगांवर कीडरोगांचा प्रादूर्भाव अधिक प्रमाणात वाढण्याची शक्यता तज्ज्ञांकडून व्यक्त केली जात आहे.

वाशीम जिल्ह्यात मालेगाव तालुक्यातील उडी येथील रणजित घुगे यांच्या शेतातील तूर पिकाची दोन दिवसांतील वादळी वाऱ्यासह आलेल्या पावसाने प्रचंड नुकसान झाले. परिपक्व झालेल्या शेंगा आटोआप फुटल्या आहेत. यातून काय पीक हातात लागेल असा प्रश्न त्यांनी उपस्थित केला. खरिपातील सोयाबीनचा पाऊस नसल्याने बोजवारा झाला होता.