यंदा ३ एकर हळद लागवड आहे. खूप मोठ्या प्रमाणावर कंद सड, कंद माशी, पर्ण करपा आढळून येत आहे. कीड, रोगाच्या नियंत्रणासाठी केलेला खर्च वाया गेला. हळदीचे नुकसान झाले आहे. पुढच्या वर्षी लागवडीसाठी घरचे बेणे उपलब्ध होते की नाही यांची खात्री राहिली नाही.

आमच्या भागात हळदीमध्ये मोठ्या प्रमाणावर कंद सड आढळून येत आहे. त्यामुळे हळदीच्या दर्जावर परिणाम होणार आहे. प्रतवारी घसरल्यामुळे कमी बाजार मिळून शेतकऱ्यांचे नुकसान होऊ शकते.

पारंपरिक हळद लागवड केल्या जाणाऱ्या भागात कंद सडचा प्रादुर्भाव अधिक दिसून येत आहे. त्यातुलनेत नवीन हळद लागवड सुरू झालेल्या भागात प्रादुर्भाव कमी आहे. पाण्याचा निचरा होणाऱ्या जमिनीवर लागवड, कीड-रोगमुक्त बेण्याचा वापर, पीक फेरपालट, पाण्याचा गरजेनुसार योग्य वापर करुन जमीन वाफसा स्थितीत ठेवल्यास कंदसड टाळता येणे शक्य आहे. कंद सड झाल्यामुळे उत्पादकतेत ३० ते ४० टक्के घट येऊ शकते.