Amaravati News : मेळघाटात दरवर्षीप्रमाणे फेब्रुवारी महिन्यातच पाणीटंचाईला सुरवात झाली असून आदिवासी बांधवांना आता पाच महिन्यांपर्यंत पुन्हा या गंभीर समस्येचा सामना करावा लागणार आहे. प्रशासन कितीही पाणीटंचाई थांबविण्याचे दावे करीत असले तरी मेळघाटातील काही गावांत पाणीपुरवठा विभागाची पोल खुलताना दिसत आहे.

चिखलदरा तालुक्यातील आहाड हे जवळपास पाचशे लोकवस्तीचे गाव आहे. पाणीपुरवठा विभागाने येथे नवीन टाकी व पाइपलाइनचे काम मंजूर केले आहे. या विषयाला दोन वर्षे पूर्ण होत असून अजूनपर्यंत येथे काम पूर्ण न झाल्यामुळे जुन्या पाण्याच्या टाकीवर अवलंबून राहावे लागत आहे. जुनी पाइपलाइन व टाकी जीर्ण झाली असून आता ती गावकऱ्यांची डोकेदुखी ठरत आहे.

चिखलदरा तालुक्यातील आहाड हे आदिवासीबहुल गाव असून ते खटकाली ग्रामपंचायत अंतर्गत येते. या गावाची लोकसंख्या ५०० च्या आसपास आहे, तर अंदाजे १२५ कुटुंबसंख्या आहे. जास्त करून येथे महिला वर्गच पाणी भरतात. त्यामुळे गावातील नळयोजना बंद असल्यास ते एक किलोमीटरवर असलेल्या नाल्यातून पाणी पिण्यासाठी भरतात.

नदीतील दूषित पाणी गावकरी पितात, त्यामुळे येथे साथरोग उत्पन्न होण्याची भीती नाकारता येत नाही. गावकरी ज्या नाल्यातून पिण्यासाठी पाणी भरतात त्याच नाल्यात काही पुरुष मंडळी प्रातःविधी आटोपतात. असे असताना गावातील नेतेमंडळी, सचिव तसेच येथील आरोग्य कर्मचारी बघ्याची भूमिका घेत आहेत.

गावातील नागरिकांच्या आरोग्याला धोका निर्माण होईल व त्याचे विपरीत परिणाम काय होतील, या बाबीशी त्यांना काहीही देणेघेणे नाही. येथील महिला वर्ग घनदाट जंगलातील नाल्यातून पाणी भरत असल्याने येथील हिंस्र पशुंचा धोका नेहमीच राहतो. काही विपरीत घटना घडल्यास याला जबाबदार कोण, असा सवाल करण्यात येत आहे.