Akola News : अकोला जिल्ह्यातील टाकळी खुर्द येथील सरपंच व तिच्या वडिलांविरुद्ध ५० हजार रुपयांची लाच मागितल्याच्या आरोपाखाली पोलिस कारवाई करण्यात आली आहे. शुक्रवारी (ता. ६) अकोला लाचलुचपत प्रतिबंधक विभागाने ही कारवाई केली आहे.

या प्रकरणी तक्रारदाराने म्हटले आहे, की त्यांचे गॅरेज वडिलांनी खरेदी केलेल्या गुंठेवारी प्लॉटवर स्थलांतरित करायचे होते. त्यामुळे त्यांनी २७ जुलैला हा प्लॉट अकृषिक करण्यासाठी ग्रामपंचायतीकडे सर्व कागदपत्रांसह लेखी अर्ज दिला होता.

मात्र सरपंच प्रज्ञा दामोदर यांनी वेळोवेळी ‘ना हरकत’ प्रमाणपत्र देण्यास टाळाटाळ केली. ३१ ऑगस्टला तक्रारदार हे सरपंच प्रज्ञा दामोदरला भेटले असता, त्यांनी ‘ना हरकत’ प्रमाणपत्र देण्यासाठी ५० हजार रुपये द्यावे लागतील, अशी मागणी केली.

या प्रकारच्या तक्रारीवरून शुक्रवारी दोन शासकीय पंचासमक्ष लाच मागणी पडताळणी कार्यवाही करण्यात आली. प्रज्ञा दामोदर यांनी तडजोडीअंती ४० हजार रुपयांची मागणी करून अॅडव्हॉन्स म्हणून आणून द्या असे म्हटले. याची खातरजमा केल्यानंतर ग्राम टाकळी खुर्द येथे शासकीय पंचासमक्ष सापळा लावण्यात आला असता सरपंच प्रज्ञाचे वडील जगजीवन लहुजी दामोदर यांनी प्रज्ञा दामोदर हिच्या सांगण्यावरून १० हजार रुपये तक्रारदारांकडून स्वीकारले. या वेळी लपून बसलेल्या पोलिसांनी दामोदर यांना अटक केली.

दहीहांडा (ता. अकोट, जि. अकोला) पोलिस ठाण्यात सरपंच व तिच्या वडलांविरुद्ध गुन्हा दाखल करण्यात आला. ही कारवाई पोलिस अधीक्षक मारुती जगताप, अपर पोलिस अधीक्षक सच्चिदानंद शिंदे आणि अपर पोलिस अधीक्षक अनिल पवार व पोलिस उपअधीक्षक मिलिंद बहाकर यांच्या मार्गदर्शनाखाली पोलिस निरीक्षक नरेंद्र खैरनार, सचिन सावंत, पोलिस अंमलदार डिगांबर जाधव, श्रीकृष्ण पळसपगार, विलेश शेगोकार, संदीप ढाले, प्रिया सुरुवाडे, अर्चना घोडेस्वार यांनी केली.