Pune News: खरीप हंगाम-२०२४ मधील पीकविम्याची भरपाई शेतकऱ्यांच्या खात्यात जमा करण्याचे काम सुरू आहे. शेतकऱ्यांना २२ मेपर्यंत एकूण चार ट्रिगरमधून ३ हजार ७७७ कोटी रुपयांची भरपाई मंजूर झाली. त्यापैकी स्थानिक नैसर्गिक आपत्ती आणि हंगामातील प्रतिकूल परिस्थिती या ट्रिगरमधून ३ हजार २७९ कोटी रुपये शेतकऱ्यांच्या खात्यात जमा झाले. शेतकऱ्यांना आणखी ४९८ कोटी रुपये मिळणार आहेत.

खरीप हंगाम-२०२४ साठी स्थानिक नैसर्गिक आपत्ती हंगामातील प्रतिकूल परिस्थिती, काढणीपश्चात नुकसान भरपाई आणि पीक कापणी प्रयोगावर आधारित भरपाई शेतकऱ्यांना मंजूर झाली आहे. मात्र शेतकऱ्यांना सध्या केवळ स्थानिक नैसर्गिक आपत्ती आणि हंगामातील प्रतिकूल परिस्थिती या दोन ट्रिगरची भरपाई पूर्ण देण्याचे काम सुरू आहे. राज्य सरकारने आपल्या हिश्श्याचा दुसरा हप्ता दिल्यानंतर काढणीपश्चात नुकसान भरपाई आणि पीक कापणी प्रयोगावर आधारित पूर्ण भरपाई शेतकऱ्यांना मिळेल.

पीक कापणी प्रयोगावर आधारित भरपाई कमी

खरीप हंगाम-२०२४ मध्ये राज्यातील शेतकऱ्यांना सर्वांत कमी भरपाई पीक कापणी प्रयोगावर आधारित ट्रिगरमधून मंजूर झाली आहे. या ट्रिगरमधून केवळ १८ कोटी रुपये भरपाई मंजूर झाली. सर्वाधिक म्हणजे २,७७१ कोटी रुपये भरपाई स्थानिक नैसर्गिक आपत्ती या ट्रिगरमधून मिळाली. हंगामातील प्रतिकूल परिस्थिती या ट्रिगरमधून ७१३ कोटी, तर काढणीपश्चात नुकसान या ट्रिगरमधून २७५ कोटी रुपये भरपाई मंजूर झाली. खरीप २०२५ पासून पीकविम्यातून केवळ पीक कापणी प्रयोगावर आधारितच भरपाई मिळणार आहे. इतर ट्रिगर पीक विम्यातून वगळले जाणार आहेत.

ट्रिगरनिहाय मंजूर भरपाई

२,७७१ कोटी

स्थानिक आपत्ती

७१३ कोटी

प्रतिकूल परिस्थिती

२७५ कोटी

काढणीपश्चात नुकसान

१८ कोटी

पीक कापणी प्रयोग

३,७७७ कोटी

एकूण मंजूर भरपाई

शेतकऱ्यांना मिळालेली भरपाई

२,५६४ कोटी

स्थानिक आपत्ती

७०७ कोटी

प्रतिकूल परिस्थिती

६.४५ कोटी

पीक कापणी

३,२७९ कोटी

एकूण मिळालेली भरपाई