Crop Damage Compensation : पावसामुळे झालेल्या नुकसानीची शेतकऱ्यांना मदतीची अपेक्षा

Dhule News : कुवे, अर्थे, निमझरी (ता. शिरपूर) परिसरात मागील वर्षी मार्चमध्ये पावसामुळे शेतीला मोठा फटका बसला. पंचनामे पूर्ण झाले. पण शेतकऱ्यांना तत्काळ भरपाई मिळाली नाही. तातडीने भरपाईची अपेक्षा शेतकऱ्यांनी व्यक्त केली आहे.

शेतातून काढून ठेवलेला शेतीमाल जमिनदोस्त झाला. यामुळे शेतकऱ्यांचे मोठे नुकसान झाले होते. महसूल विभागाने पंचनामे करून नुकसान भरपाईबाबतचा अहवाल तयार केला. परंतु अधिकाधिक भरपाई मिळवून द्यावी, अशी मागणी केली जात आहे.

कुवे परिसरात वादळ व पाठोपाठ पावसाने अर्धा तास धुमाकूळ घातला होता. अचानक आलेल्या अस्मानी आपत्तीमुळे शेतकरी संकटात सापडले. डोळ्यादेखत तयार झालेला शेतीमाल हवेत उधळला गेला. पाठोपाठ उभी पिकेही कोलमडून पडली.

कष्टाने फुलवलेला शेतीमाल वाहून जाताना पाहून त्यांच्या डोळ्यात अश्रू उभे राहिले. मका, हरभरा, बाजरी, गहू, ज्वारी आदी पिकांसाठी कुवे परिसर प्रसिद्ध आहे. मक्याच्या पेरणीला तीन महिने पूर्ण झाले होते. गहू आणि हरभराही जोमात होते.

काही ठिकाणी कापणी करून पिके वाळवण्यासाठी बांधावर, खळ्यात ठेवली होती. उर्वरित पिके काढणीच्या अवस्थेत होती. वादळाने बांधावरील शेतीमाल उडवून नेला तर शेतातील उभी पिके जमीनदोस्त केली. काही शेतकऱ्यांचे वस्तुनिष्ठ पंचनामे झाले. परंतु अनेकांची नुकसान भरपाई नुकसानीच्या टक्केवारीत अडकली, असे शेतकऱ्यांचे म्हणणे आहे.