Nagpur News : कीडनाशकाची परिणामकारकता साधण्यासाठी पाण्याचा सामू (पीएच) महत्त्वाचा ठरतो. या संदर्भाने शेतकरी संघटनेकडून सातत्याने पाठपुरावा करण्यात आल्यानंतर केंद्रीय कीटकनाशक मंडळ व नोंदणीकरण समितीने कीडनाशकांच्या ‘लेबल’वर पाण्याच्या सामूबाबत माहिती नोंदविण्याची सूचना केली आहे. मंडळाच्या नुकत्याच झालेल्या बैठकीत या संबंधीचे निर्देश देण्यात आले.

कीडनाशकांची परिणामकारकता साधण्यासाठी पाण्याचा सामू (पीएच) हा महत्त्वाचा घटक असतो. त्यादृष्टीने आदर्श अशा संतुलित सामू असलेल्या पाण्याचा उपयोग महत्त्वाचा ठरतो. मात्र पाणी अल्कधर्मी असल्यास कीडनाशकाचा अपेक्षित परिणाम साधला जात नाही. ही बाब लक्षात घेता शेतकरी संघटनेच्या तंत्रज्ञान व कृषी विज्ञान विस्तार आघाडीचे प्रमुख मिलिंद दामले यांनी या संदर्भाने पाठपुरावा केला होता.

केंद्रीय मंत्री नितीन गडकरी, तत्कालीन खासदार भावना गवळी, नवनीत राणा, आमदार मदन येरावार, डॉ. सी. डी. मायी यांच्या माध्यमातून त्यांनी केंद्रीय कीटकनाशक मंडळ व नोंदणीकरण समिती (सीआयबीआरसी) त्यासोबतच भारतीय कृषी संशोधन परिषदेकडे सातत्याने पत्रव्यवहार करीत ही बाब बिंबविण्याचा प्रयत्न केला. या साऱ्याच्या परिणामी ‘सीआयबीआरसी’च्या नुकत्याच पार पडलेल्या ४५८ व्या बैठकीत कीडनाशक फवारणीसाठी पाण्याच्या सामूचे (पीएच) महत्त्व या विषयावर मंथन झाले. त्याआधारे कृषी रसायन उद्योगातील कंपन्यांना त्यांच्या उत्पादनांच्या लेबल आणि माहितिपत्रकावर फवारणीच्या पाण्याचा योग्य सामू किती असावा ही माहिती नोंदविण्याची शिफारस वजा सूचना करण्यात आली आहे.

भारतीय कृषी संशोधन परिषद तसेच केंद्रीय कीटकनाशक मंडळ आणि नोंदणी समितीच्या सचिवालयातील अभ्यासाअंती नोंदविलेल्या निष्कर्षांचा हवाला देत हा निर्णय घेण्यात आला आहे. विशेष म्हणजे मिलिंद दामले यांनी या संदर्भाने कृषीच्या गुणवत्ता नियंत्रण व निविष्ठा संचालकांच्या स्तरावरही पाठपुरावा केला होता. त्याआधारे कृषी विभागाने ‘आयसीएसआर’कडे पाठपुरावा केला. त्यामुळेही यंत्रणावर दबाव वाढत हा निर्णय घेण्यात आल्याचे सांगितले जाते.