Pune News: देशात कोविड-१९ च्या रुग्णसंख्येत  दिवसेंदिवस पुन्हा वाढच होताना दिसत आहे. यातच केंद्रीय आरोग्य आणि कुटुंब कल्याण मंत्रालयाने रविवारी (ता.१) जूनला जाहीर केलेल्या आकडेवारीनुसार, देशातील सक्रिय असलेल्या रुग्णांची संख्या आता ३ हजार ७५८ वर पोहोचली आहे. यामध्ये  केरळमध्ये सर्वाधिक १ हजार ४०० सक्रिय रुग्ण आहे. यात महाराष्ट्रात ५०६ तर दिल्लीमध्ये ३०० रुग्ण आहेत.

गेल्या २४ तासांत देशात ३६० नवीन कोविड रुग्ण आढळले असून त्यापैकी केरळमध्ये ६४, दिल्लीमध्ये ६१ आणि महाराष्ट्रात ६५ रुग्णांची नव्याने नोंद झाली आहे. तसेच या काळात कोविडशी संबंधित २ मृत्यूही झाले आहे. त्यात केरळमधील २४ वर्षीय महिला आणि कर्नाटकातील ६३ वर्षीय पुरुष हे दोघेही अन्य गंभीर आजारांनी ग्रस्त होते आणि कोविड पॉझिटिव्ह आढळले होते.

महाराष्ट्रातील सद्यस्थिती...

महाराष्ट्रात १ जानेवारीपासून एकूण ८१४ रुग्णांची नोंद झाली आहे. तर राज्यात रविवारी नोंदवण्यात आलेल्या ६५ नव्या रुग्णांमुळे ही एकूण संख्या ८१४ वर पोहोचली आहे. सध्या राज्यात ५०६ सक्रिय रुग्ण असून आतापर्यंत ३०० जण बरे झाले आहेत.

जिल्हानिहाय रुग्णवाढ...

पुणे महापालिका – २५

मुंबई – २२

ठाणे – ९

पिंपरी चिंचवड – ६

कोल्हापूर – २

नागपूर – १

अशा परिस्थितीत पुणे, मुंबई आणि ठाणे परिसरात पुन्हा कोविडचा संसर्ग वाढत असल्याने प्रशासनाने खबरदारी घेण्याचे निर्देश दिले आहेत. नागरिकांनी विनाकारण गर्दी टाळावी आणि लक्षणे आढळल्यास त्वरित तपासणी करून उपचार घ्यावेत, असे आवाहन करण्यात आले आहे.