Kharif Sowing 2025 : कोरडवाहू शेतकऱ्यांनी पेरणीची घाई करू नये; कृषी विभागाचं आवाहन

Monsoon Rain : मॉन्सूनच्या वाऱ्यांनी जोरदार चाल करत नियोजित आणि सरासरी वेळेआधीच महाराष्ट्राचा काही भाग व्यापला. त्यामुळे शेतकरी आता खरीप पेरणीसाठी लगबग करू लागली आहेत. परंतु शेतकऱ्यांनी पेरणीची घाई करू नये, असं आवाहन कृषी विभागाने रविवारी (ता.१) केलं आहे.

मे महिन्यात पूर्व मॉन्सूनच्या पावसाने हजेरी लावली. तसेच मॉन्सूनने वेळेच्या आधीच मुसंडी मारली. त्यामुळे जमिनीत पेरणी योग्य ओल आहे. त्यामुळे शेतकरी पेरणीची घाई करत आहेत. तसेच काही माध्यमांमधून कथित हवामान अभ्यासक पेरणी करण्याचे सल्ले देत आहेत. परंतु राज्यात १० जूनपर्यंत पावसात घटीचा अंदाज असल्याने शेतकऱ्यांनी पेरणीची घाई करू नये, असं कृषी विभागाने सांगितलं आहे.

मॉन्सूनच्या जोरदार चालीनंतर मागील तीन दिवसांपासून चाल मंदावली आहे. या पार्श्वभूमीवर कृषी विभागाने शेतकऱ्यांना आवाहन करण्यात आलं आहे. बदलेलेल्या वातावरणामुळे मान्सूनच्या प्रवासाची गती कमी होण्यास सुरुवात झाली, आणि आता तर मान्सूनचा प्रवास पूर्णपणे रखडला आहे. किमान १० जूनपर्यंत तरी मॉन्सूनचा प्रवास थांबणार असल्याचा अंदाज आहे, असंही कृषी विभागाने सांगितलं आहे.

केवळ पश्चिम किनारपट्टी आणि राज्यातील काही इतर किरकोळ भागात प्रामुख्याने हलका पाऊस पडण्याचा अंदाज आहे. राज्यातील बहुतांश भागात मात्र कोरडे हवामान अपेक्षित आहे, ज्यामुळे कमाल तापमानात वाढ होईल, असंही कृषी विभागाने माहिती दिली आहे.

या दरम्यान विदर्भात ४० अंशापर्यंत कमाल तापमान राहण्याची शक्यता आहे तर मराठवाडा आणि खानदेशात कमाल तापमान ३५ ते ४० अंशामध्ये राहील. या कोरड्या हवामानाचा वाईट परिणाम पेरणी आणि लागवडीवर पडण्याची शक्यता कृषी विभागाने वर्तवली आहे.

तसेच कोणत्याही खोट्या बातम्यांवर विश्वास ठेवून शेतकऱ्यांनी प्रामुख्याने कोरडवाहू भागात पेरणी आणि लागवडीची घाई करू नये, असं आवाहन कृषी विभागाकडून परत एकदा करण्यात आलं आहे.