Jalgaon News : आदिवासी कोळी जमातीबाबत राजकारणातील शत्रू व मित्रांनी सारखीच भूमिका निभावल्याचा धिक्कार व जाहीर निषेध करून या राज्यव्यापी महाआंदोलनास तुर्तास स्थगिती देण्याबाबत निर्णय घेऊन पुढील समाजहिताची रणनीती जाहीर करण्यात येईल, अशी माहिती राज्यव्यापी महाआंदोलनाचे अध्यक्ष जगन्नाथ बाविस्कर यांनी दिली.

जळगाव येथील शिवतीर्थ मैदानावर सुरू असलेल्या आंदोलनस्थळी उपोषणकर्ते पद्माकर कोळी (यावल), माजी नगराध्यक्ष चतुर्भुज सोनवणे यांचे हस्ते लिंबूपाणी देऊन उपोषणाची सांगता करण्यात आली. लवकरच सर्व प्रमुख पदाधिकारी, उपोषणकर्ते व आंदोलनकर्त्यांची मुंबई येथे बैठक घेण्यात घेऊन तातडीने मिशन आझाद मैदान राबविण्यात येईल.

आदिवासी कोळी जमातीच्या संविधानिक न्याय, हक्क व अधिकारांसाठी २३ जानेवारी पासून महाराष्ट्रातील प्रत्येक जिल्हाधिकारी कार्यालयांसमोर आदिवासी कोळी समाज समन्वय समितीचे मुख्य समन्वयक व राज्यव्यापी महाआंदोलनाचे निमंत्रक अॕड.शरदचंद्र जाधव (पुणे), प्रभारी अध्यक्ष आयोजक सखाराम बिऱ्हाडे छत्रपती संभाजीनगर यांच्या मार्गदर्शनाने अन्नदान सत्याग्रह जगन्नाथ बाविस्कर यांच्या अध्यक्षतेखाली शांतता, कायदा व सुव्यवस्था राखून राज्यभर अन्नत्याग सत्याग्रह, ठिय्या आंदोलन, साखळी उपोषण सुरू होते.

जिल्हाधिकारी यांना अतिसंवेदनशील निवेदन देण्यात आले होते. आंदोलनकर्त्यांच्या मागण्यानुसार जिल्हाधिकाऱ्यांनी शासनाकडे पाठविलेल्या अहवालानुसार संबंधित आदिवासी विकास विभागाच्या प्रधान सचिवांशी मंत्रालयात सविस्तर मुद्देसूद चर्चा करण्यात आली.

लवकरच मुख्यमंत्री यांच्याशी याविषयी शासकीय बैठक घेण्यात येणार असून या आंदोलनामुळे आदिवासी कोळी जमातीच्या ज्वलंत प्रश्नासंदर्भात १९८६ पासून धूळ खात पडलेल्या (कै.) दाजिबा पाटील समितीच्या अहवालावर विधिमंडळात विस्तृत चर्चा होण्याची शक्यता आहे, असे सांगण्यात आले.