Lumpy Skin Disease: ‘लम्पी’ची लक्षणे आढळलेल्या १०० जनावरांवर उपचार सुरू

Solapur News: जिल्ह्यात सुमारे ९०० जनावरांना लम्पी स्कीनची लागण झाल्याचे आढळून आले होते. पशुपालकांनी घेतलेली काळजी व पशुसंवर्धन विभागाकडून उपचारानंतर लम्पी नियंत्रणात आली असून आणखी १०० जनावरांवर उपचार सुरू असल्याची माहिती जिल्हा पशुसंवर्धन विभागाने दिली.

महिन्यात पडलेल्या पावसानंतर जिल्ह्याच्या ग्रामीण भागात डास व माशांमुळे गोवर्गीय जनावरांना लम्पीची लागण झाली. जिल्ह्यात सुमारे ९०० जनावरांना लम्पीची लागण झाली. सोलापूरसह राज्यभरात लम्पीची साथ आल्याने पशुसंवर्धन आयुक्तांनी मार्गदर्शक सूचना जारी केल्या होत्या. पावसाळ्याच्या पार्श्वभूमीवर जिल्ह्यात जनावरांसाठी प्रतिबंधात्मक लसीकरण मोहीम राबविण्यात आली.

त्यात जिल्ह्यासाठी लम्पीच्या पाच लाख ११ हजार लसी प्राप्त झाल्या होत्या. त्या सर्व लसी जनावरांना देण्यात आल्या आहेत. आता साथ नियंत्रणात असली, तरी आवश्यकतेनुसार लसी मागवण्यात येणार आहेत. त्यामुळे पशुपालकांनी आपल्या लसीकरण न केलेल्या, नव्या व खरेदी केलेल्या जनावरांना लम्पीचे लसीकरण करून घ्यावे, असे आवाहन जिल्हा पशुसंवर्धन विभागाने केले आहे. 

‘पशुपालकांनी दक्षता घ्यावी’

पशुसंवर्धन विभागाने लम्पीची लागण झालेल्या जनावरांवर उपचारासह त्यांचे नमुने घेऊन तपासणीसाठी प्रयोगशाळेत पाठवले आहेत. लसीकरणासह उपचारामुळे ८०० जनावरे बरी झाल्याने लम्पी नियंत्रणात आला आहे.

उर्वरित १०० जनावरांवर उपचार सुरू आहेत. तसेच नवीन बाधित जनावरेही आढळत असली, तरी त्यांचे प्रमाण अत्यल्प असल्याचे जिल्हा पशुसंवर्धन उपायुक्त डॉ. विशाल येवले यांनी सांगितले. साथ आटोक्यात येण्यासाठी पशुपालकांनी मार्गदर्शक सूचनांनुसार दक्षता घ्यावी. असे जिल्हा पशुसंवर्धन विभागाने सांगितले.