Nagpur News : यंदा पाऊस कमी झाल्याने ४० तालुक्यांत दुष्काळ जाहीर करण्यात आला आहे. तर १ हजार २१ महसूल मंडलांत दुष्काळसदृश स्थिती घोषित करण्यात आली. यात नागपूर जिल्ह्यातील सिर्सी, मेंधला, सावनेर, पाटणसावंगी, देवलापार, खात, येनवा, मोहपा, केळवद, खापा, निमखेडा या ११ मंडलांचा समावेश आहे. दुष्काळऐवजी दुष्काळसदृश स्थिती जाहीर करण्यात आल्याने येथील शेतकऱ्यांना आर्थिक मदत मिळणार नसून काही सवलतीच मिळणार आहेत.

यंदा पाऊस उशिराने दाखल झाला. त्यातही अनेक दिवस खंड राहिला. तर काही वेळा अतिवृष्टी झाली. याचा फटका पिकांना बसला. परिणामी, उत्पादन कमी झाले. सायोबीन तर जवळपास गेल्यात जमा आहे. तुरीचे उत्पादन घटणार आहे. कापसावरही परिणाम होणार असल्याचे सांगण्यात येते.

कमी पाऊस पडल्याने शासनाने ४० तालुक्यांत दुष्काळ जाहीर केला. दुष्काळी भागात शासनाकडून आर्थिक मदत मिळणार असल्याचे सांगण्यात येते. राज्य शासनाने आर्थिक मर्यादेतही वाढ केली आहे. त्यामुळे त्याचा फायदा शेतकऱ्यांना होईल. राज्यातील १ हजार २१ महसूल मंडलांत पाऊस ७५० मिमीपेक्षा कमी झाला आहे. त्यामुळे या मंडलांत दुष्काळसदृश स्थिती घोषित करण्यात आली. पण यामुळे येथील शेतकऱ्यांना आर्थिक मोबदला मिळणार नसून केवळ काही सवलतीच मिळतील.

.या मिळणार सवलती

जमीन महसुलात सूट

सहकारी कर्जाचे पुनर्गठन

शेतीशी निगडित कर्जाच्या वसुलीस स्थगिती

कृषिपंपाच्या चालू वीजबिलात ३३.५ टक्के सूट

शालेय-महाविद्यालयीन विद्यार्थ्यांची परीक्षा शुल्क माफी

‘रोहयो’तील कामांच्या निकषात काही प्रमाणात शिथिलता

आवश्यक तेथे पिण्याचे पाणी पुरविण्यासाठी टँकर पुरवठा