Buldhana News : बुलडाणा जिल्ह्यातील प्रस्तावित सिंदखेडराजा ते शेगाव या ‘भक्ती’ महामार्गाला सर्वांचा विरोध असतानाही शासनाच्या वतीने भूसंपादनाची प्राथमिक अधिसूचना ग्रामपंचायतींच्या तसेच तलाठी कार्यालयांच्या फलकांवर लावण्यात येत आहे. मध्यंतरी या महामार्गाचा विषय थंडावला होता. आता अधिसूचना फलकांवर लावल्या जात असल्याने पुन्हा हा विषय चर्चेत आला आहे.

मुंबई ते नागपूर बाळासाहेब ठाकरे समृद्धी महामार्गाला तीर्थक्षेत्र शेगाव जोडण्यासाठी हा महामार्ग तयार केला जाणार असल्याचे सांगितले जाते. सुमारे १०९ किलोमीटर लांबीचा हा रस्ता असून ४६ गावशिवारांतून महामार्ग प्रस्तावित असल्याचे सांगितले जाते. यासाठी पहिल्या टप्प्प्यात सुमारे पाच हजार कोटींचे बजेट आहे.

यासाठी सुमारे दीड हजारांवर शेतकऱ्यांची चार हजार एकरांपेक्षा अधिक जमीन जाणार आहे. यामुळे अनेकजण भूमिहीन बनतील. शिवाय या महामार्गाची कोणीही मागणी केलेली नाही. सर्वच पक्षांचे लोकप्रतिनिधी यासाठी विरोधी भूमिकेत आहेत. गावागावांत गेल्या काळात आंदोलनेही झाली. सिंदखेडराजा येथून समृद्धी महामार्गावरून शेगावला जाण्यासाठी सध्या चांगल्या दर्जाचे पर्यायी रस्ते उपलब्ध आहेत.

देऊळगावराजा ते खामगाव मार्गालगत नवीन महामार्ग तयार होईल. जुन्या रस्त्याच्या ५० ते २०० मीटर अंतरावरून हा समांतर २० ते २५ पंचवीस किलोमीटर रस्ता जाणार असल्याचा दावा आंदोलक करीत आहेत. त्यामुळे हा महामार्ग नको, असा सार्वत्रिक सूर आहे.

विधिमंडळाच्या अधिवेशनातही हा मुद्दा गाजवणार असे जिल्ह्यातील लोकप्रतिनिधींनी यापूर्वी स्पष्ट केले होते. मात्र, तरीही या महामार्गाची प्रक्रिया पुढे नेली जात आहे. विशेष म्हणजे भक्ती महामार्ग रद्द करण्याबाबत शासनस्तरावरून कुठल्याही सूचना नसल्याने प्रशासकीय कार्यवाही पूर्ण केली जात असल्याचे अधिकारी सांगत आहेत.

यापूर्वी चिखली तालुक्यात अधिसूचना झळकावण्यात आलेली आहे. त्यानंतर आता सिंदखेडराजा उपविभागात देऊळगावराजा तालुक्यात १० ते १२ गावांमध्ये अधिसूचना प्रसिद्ध झाली आहे. या तालुक्यातील सुमारे २०० हेक्टर जमीन जाणार असल्याची माहिती आहे.