Mumbai-Ahmedabad Highway : महामार्गासाठी गावित आक्रमक

Mumbai News : मुंबई-अहमदाबाद महामार्गाच्या दुरवस्थेबाबत पालघरचे माजी खासदार राजेंद्र गावित आता आक्रमक झाले आहेत. रस्त्यांची चाळण झाल्याने राष्ट्रीय महामार्ग प्राधिकरणाच्या अभियंत्यांची गावितांनी कानउघाडणी केली.

राज्यपाल रमेश बैस यांच्या पालघर जिल्हा दौऱ्यानिमित्त जिल्हाधिकारी, महापालिकेच्या अधिकाऱ्यांसोबत त्यांनी पाहणी केली. या पाहणी दौऱ्यात पालघरचे माजी खासदार राजेंद्र गावित यांनी रस्त्यांच्या दुरवस्थेबद्दल अधिकाऱ्यांबरोबर चर्चा केली.

महामार्गाच्या व्हाईट टॅपिंगच्या कामाला पावसाळ्याच्या सुरुवातीलाच सुरुवात झाली होती. त्यामुळे व्हाईट टॅपिंगचे काम निकृष्ट दर्जाचे असल्याने आंदोलनही केले होते. त्यानंतर जिल्हाधिकाऱ्यांनी महामार्गाची पाहणी केली होती. त्या वेळी माजी खासदार गावित यांनी त्याबाबत चर्चा केली.

या वेळी वसई विरार महापालिकेचे अधिकारी उपस्थित होते. महामार्गाची दुरवस्था झाल्याने राजेंद्र गावित यांनी जिल्हाधिकाऱ्यांसह संबंधित अधिकाऱ्यांनाही सुनावले आहे. या वेळी पालिकेच्या अधिकाऱ्यांनाही त्यांनी विकासाच्या मुद्यावरून धारेवर धरले.

राज्यपालांचा महामार्गावरून प्रवास

बहुचर्चित मुंबई-अहमदाबाद महामार्गावरून राज्यपाल रमेश बैस पालघर जिल्ह्यातील वाडा तालुक्यातील गालतरे येथील ईको व्हिलेज येथे कार्यक्रमासाठी आले होते. त्यामुळे सुरक्षेच्या दृष्टिकोनातून जिल्हाधिकाऱ्यांनी या महामार्गाची पाहणी केली होती.

वाहतूक कोंडी

मुंबई-अहमदाबाद महामार्गावरून राज्यपालांचा प्रवास सुखरूप होण्यासाठी मोठा पोलिस बंदोबस्त तैनात करण्यात आला होता, सोबत महामार्गावर सुरक्षेच्या उपाययोजना करण्यात आल्या होत्या. दिवसभर महामार्ग वाहतूक कोंडीमुक्त होता.