Bhakti Mahamarg : शेगाव-सिंदखेडराजा भक्ती महामार्ग रद्द करा

Buldana News : सिंदखेडराजा ते शेगाव या भक्ती महामार्गासाठी शेतजमिनी अधिग्रहित केल्या जाणार असून, या शेतकऱ्यांमधून मोठ्या प्रमाणात विरोध होऊ लागला आहेत. गावागावांत शेतकरी विरोधाचे फलक लावत आहेत.

याची दखल घेत महायुती सरकारमधील सिंदखेडराजा मतदार संघाचे आमदार डॉ. राजेंद्र शिंगणे यांनी मुख्यमंत्री एकनाथ शिंदे यांना तातडीने पत्र देत शेतजमिनीचे अधिग्रहण थांबवावे व हा भक्ती महामार्ग रद्द करावा अशी मागणी केली आहे.

जिल्ह्यात सिंदखेडराजा ते शेगाव असा भक्ती महामार्ग तयार केला जाणार आहे. हा महामार्ग समृद्धीला जोडला जाणार असून, यामुळे मुंबईकडून येणाऱ्यांना सोयीचे होणार आहे. परंतु या महामार्गासाठी मोठ्या प्रमाणात जमिनीचे अधिग्रहण करावे लागणार आहे.

यात उपजाऊ जमिनी जाणार असल्याची भीती शेतकऱ्यांत वाढली. सिंदखेडराजा, देऊळगावराजा, चिखली, खामगाव, शेगाव या तालुक्यांतील ४३ गावांतील शेतकऱ्यांच्या सुपीक जमिनी यासाठी अधिग्रहित करण्यात येत आहे.

या अधिग्रहण सूचनेमुळे शेतकऱ्यांमध्ये प्रचंड असंतोष तयार झाला. प्रस्तावित भक्ती महामार्गामुळे शेतकरी मोठ्या प्रमाणात भूमिहीन होणार आहेत. सदर ४३ गावांतील शेतकऱ्यांचा या भक्ती मार्गाला विरोध आहे.

‘ॲग्रोवन’ची दखल

शेतकरी आंदोलने करीत असून याला ‘ॲग्रोवन’ने ठळक प्रसिद्धी दिली. याची दखल आता शासकीय यंत्रणा, लोकप्रतिनिधीही घेत आहेत. हा मुद्दा येत्या लोकसभा निवडणुकीत अडचणीचा ठरण्याची शक्यता वाढते आहे. त्यामुळे सर्वच जण आता या संवेदनशील मुद्यावर शेतकऱ्यांच्या बाजूने उभे राहू लागले आहेत.