Alibaug News : सर्वसामान्यांना भेडसावणारे गॅस सिलिंडरचे हजारी पार केलेले दर निवडणुकीच्या तोंडावर ९०० रुपयांपर्यंत आणण्यात आले; तरीही ते गोरगरिबांच्या आवाक्‍याबाहेर आहेत. परिणामी रायगडमधील २५ हजार गृहिणींनी घरात गॅस शेगडी असूनही चुलीवर स्वयंपाक करणे सुरू केले असून अनेक वाड्या-वस्‍त्‍यांमध्ये लाकूडफाट्यासाठी शोधाशोध होताना दिसते.

आर्थिकदृष्ट्या कमकुवत कुटुंबातील महिलांची चुलीतील धुरापासून सुटका व्हावी म्हणून केंद्र सरकारने २०१६ मध्ये उज्ज्वला गॅस योजना सुरू केली आहे. वाढत्या महागाईत गॅस सिलिंडरचे दर परवडत नसल्याने महिला सरपण शोधण्यासाठी पुन्हा जंगलात फिरू लागल्या आहेत. लाकडे जाळण्यातून होणारी पर्यावरणाची हानी टाळण्यासोबतच महिलांचे आरोग्य सुधारावे म्हणून केंद्र सरकारने ही योजना गावोगावी राबवली होती.

रायगड जिल्ह्यातही उज्ज्वला योजनेला चांगला प्रतिसाद मिळाला होता. गॅस सिलिंडर, शेगडी असे साहित्य कोणतेही शुल्क न आकारता वाटण्यात येत होते. मात्र, त्यानंतर प्रत्येक रिफिलिंगमधून शेगडी गॅस सिलिंडरचे पैसे वसूल करण्यात येऊ लागले. शिवाय मिळणारी सवलतही बंद झाली आहे.

घरगुती गॅसच्या किंमती दिवसेंदिवस वाढत असताना गरीब कुटुबांतील महिलांना प्रत्येक वेळेला गॅसचे पैसे देणे शक्य होत नसल्याने अनेक जणींना गॅस शेगडीचा वापर कमी केला. घरात गॅड शेगडी आहेत, परंतु सिलिंडर घेणे परवडत नसल्याने सांगण्यात येत आहे.

नवीन जोडण्या देण्यास टाळाटाळ

रायगड जिल्ह्यात ऑगस्ट २०१९ पासून उज्ज्वला गॅस योजनेतून नवीन जोडणी देणेच बंद झाले आहे. केंद्र शासनाने ही योजना राबवताना ८ कोटी जोडणीचे ध्येय दिले होते. केंद्राने ठरवून दिलेली संख्या पूर्ण झाल्याने नवीन जोडण्या देण्यास गॅस कंपन्यांकडून टाळाटाळ केली जात आहे. त्यामुळे काही महिलांची इच्छा असूनही नवीन जोडण्यात अडथळे येत आहेत.

६३ हजार ७८४ गॅस जोडण्या : उज्ज्वला गॅस जोडण्या देण्यात रायगड जिल्हा राज्यात अव्वल होता. कमीत कमी कागदपत्रात मोफत शेगडी आणि गॅस सिलिंडर मिळत असल्याने पहिल्या दोन वर्षात ६३ हजार ७८४ गॅस जोडण्या देण्यात आल्‍याची माहिती जिल्हा पुरवठा कार्यालयातून देण्यात आली.