Dharashiv News : बोरी धरणाच्या सांडव्याकडून पूर्वेला वाहणाऱ्या नळदुर्ग शेजारील बोरी नदीपात्रातील गाळ शेतकऱ्यांने स्वखर्चाने काढला. यामुळे बोरी नदीपात्राचे खोलीकरण झाले आहे तर गाळ काढणारे शेतकरी शशिकांत कुलकर्णी यांची एक हेक्टर जमीन सुपीक होण्यास मदत झाली आहे.

मागील महिनाभरात शशिकांत कुलकर्णी यांनी सुमारे २ लाख ८० हजार रुपये खर्च करून १ हेक्टर क्षेत्रात बोरी नदीतील सुमारे एक हजार ट्रॕक्टर गाळ काढून टाकला. यामुळे जमीनीची सुपीकता वाढणार आहे.

तसेच बोरी नदीचे पाचशे फूट लांब, पंधरा फूट रूंद व दहा फूट खोल एवढे खोलीकरण झाले आहे. यामुळे स्वतः कुलकर्णी यांना व परीसरातील असंख्य शेतकऱ्यांना फायदा होणार आहे.

यापूर्वी २०१५ मध्ये नाम फाउंडेशन व नळदुर्ग किल्ल्याचे जतन ,संवर्धन करणाऱ्या युनिटी मल्टिकॉन्स कंपनीने बोरी नदीचे खोलीकरण केले होते त्यावेळी दोनशे पन्नास हायवा भरून गाळ श्री. कुलकर्णी यांनी शेतात टाकला होता.

यापासून प्रेरणा घेत कुलकर्णी यांनी मागील महिन्यात स्वखर्चाने बोरी नदीतील गाळ काढला.