Jalkot news : जळकोट : तालुक्यात खरिपातील मुगानंतर आता उडदाच्या काढणीस सुरुवात झाली आहे. मात्र ढगाळ वातावरण, अधूनमधून पडणारा पाऊस, मजुरीचा वाढता खर्च आणि उत्पन्नात येत असलेली घट अशा कचाट्यात शेतकरी सापडलेला आहे. कापणी करताना कधी मुसळधार पाऊस येईल याचा धसका शेतकऱ्यांनी घेतला आहे. मुगानंतर उडदाच्या काढणीस सुरवात झाली. मात्र खरीप हंगामात सततच्या पावसाने विविध पिकांच्या उत्पन्नात कमालीची घट येत आहे. पेरणीपासून ते काढणीपर्यंतचा खर्च काढल्यास हाती काहीच उरत नसल्याचे शेतकरी सांगत आहेत. तालुक्यात सुरवातीला पेरलेल्या खरिपातील उडदाच्या राशी हार्वेस्टरने केल्या जात आहेत. परंतु पावसामुळे व वावरातील चिखलामुळे उडीद कसा काढायचा हा प्रश्न आहे. मुगानंतर उडदाच्या काढणीस अनेक

ठिकाणी सुरवात झाली आहे. उडदाच्या काढणीत ढगाळ वातावरण, अधूनमधून येणाऱ्या पावसाच्या सरी, त्यात मजूर टंचाई आणि वाढलेली मजुरी अशा तिहेरी चक्रात शेतकरी सापडला आहे. फायदा-तोटा न पाहता उडदाची काढणी शेतकरी करीत आहेत.एका बॅगेला चार ते पाच हजार रुपये कापणीसाठी मागितले जात आहेत. दोनशे ते तीनशे रुपये प्रतिकट्टा (पन्नास किलो) हार्वेस्टर घेत असल्याने खर्चजास्त होत आहे. पेरणी, कोळपणी, आंतरमशागत, फवारणी, खुरपणीपासून राशीपर्यंत खर्च काढल्यास हाती भोपळा उरत आहे. सद्यःस्थितीत राशी करणे सुरू असून उतारा कमी येत असल्याने शेतकरी अडचणीत सापडला आहे.

मी एक एकरामध्ये उडदाचे पीक घेतले. पेरणीला खत घालून दोन कोळपणी केली, फवारणी केली. हरणासह वन्यप्राण्यांपासून पिकाची राखण केली. मात्र अतिपावसामुळे उडदाच्या पिकाचे नुकसान झाले. एकीकडे ढगाळ वातावरण व पाऊस कधी येईल सांगता येत नाही, त्यामुळे काढणी कशी करावी हा प्रश्न शेतकऱ्यांसमोर आहे. मजुरीही वाढली असून आणखी पाऊस जास्त आला तर हातचे पीक जाणार आहे. लागवड व काढणी खर्चाची गोळाबेरीज करता हाती भोपळाच उरत आहे.

- मधुकर डोणगावे, शेतकरी, जळकोट.

सध्या बाजारात मुगासह उडदाची काही प्रमाणात आवक सुरू आहे. पावसामुळे अनेक ठिकाणी मालाची प्रतवारी खालावलेली येत आहे.त्यामुळे उडदाचा बाजारात भाव चार हजार, पाच हजार ते साडेसात हजार प्रतिक्विटंल मिळत आहे.

- संजय मिसाळे, डत व्यापारी, जळकोट.