Kolhapur News : ऊस दराच्या मागणीसाठी स्वाभिमानी शेतकरी संघटना व आंदोलन अंकुश यांनी आंदोलनाची भूमिका घेतली आहे.

कर्नाटकातून येणारी ऊस वाहतुकीची वाहने अडवून चाकातील हवा सोडण्यात येत असल्याने विविध मार्गावर उसाने भरलेले वाहने थांबून राहिली. त्यामुळे शिरोळ दरम्यानच्या सलगर-सदलगा राज्य मार्गावर ट्रॅक्टर-ट्रॉलीच्या रांगा लागल्या होत्या.

स्वाभिमानी व आंदोलन अंकुशने पहिली उचल ३७०० रुपये व २०२३-२४ मधील गळीत हंगामासाठी २०० रुपये अंतिम हप्त्याची मागणी केली आहे. तोडगा निघत नाही तोपर्यंत ऊसतोड आणि वाहतूक करू नये. अन्यथा ती बंद पाडू, असा इशारा दिला.

गुरुवारी (ता. २८) कागवाड येथून गणेशवाडी मार्गे कर्नाटक राज्यातून ट्रॅक्टर ऊस भरून गाळपासाठी कारखान्याकडे जात असल्याची माहिती संघटनांना मिळताच औरवाड फाट्यावर उसाचे ट्रॅक्टर अडवून ट्रॅक्टर आणि ट्रॉलीच्या चाकाची हवा सोडून वाहतूक रोखून धरली. तसेच शिरोळ तालुक्यात काही ठिकाणी सुरू असलेली ऊसतोड बंद पाडली.