Sangli News : जमिनीतील कार्बनचे मोठ्या प्रमाणात उत्सर्जन होऊन पर्यावरणाचा ऱ्हास होत आहे. त्यामुळे जागतिक पातळीवर कार्बनचे उत्सर्जन रोखण्यासाठी विविध उपक्रम राबविले जात आहेत. यातूनच ‘कार्बन क्रेडिट’ही संकल्पना पुढे आली आहे. आपल्या परिसरातील ऊस उत्पादक शेतकऱ्यांनी ‘कार्बन क्रेडिट’ उपक्रमात सहभागी होऊन उत्पन्नाचा नवा स्रोत मिळवावा, असे आवाहन राजारामबापू पाटील सहकारी साखर कारखान्याचे अध्यक्ष प्रतिक पाटील यांनी केले.

येथील राजारामबापू इन्स्टिट्यूट ऑफ टेक्नॉलॉजी (आरआयटी) येथे राजारामबापू पाटील सहकारी साखर कारखाना व ग्रो इंडिगो प्रा. लि., मुंबई यांच्या संयुक्त विद्यामाने ‘ऊस शेतीसाठी कार्बन क्रेडिट’ या शिबिरात प्रतिक पाटील बोलत होते.

या वेळी कारखान्याचे उपाध्यक्ष विजयराव पाटील, शेती समितीचे अध्यक्ष विठ्ठल पाटील, प्रदीपकुमार पाटील, उपविभागीय कृषी अधिकारी जे. एस. पाटील, तालुका कृषी अधिकारी इंद्रजीत चव्हाण, ग्रो इंडिगो प्रा. लि.चे उज्ज्वल पाटील, अण्णा पऱ्हे, मिनल इनामके यांच्यासह संचालक उपस्थित होते.

प्रतिक पाटील म्हणाले, की ऊस उत्पादक शेतकऱ्यांनी ऊस तोडणीनंतर शेतातील पाचट न जाळता त्याचे शेतातच अच्छादन करावे, ठिबक सिंचनद्वारे पाणी व खताचे व्यवस्थापन करून कमीत-कमी मशागत करावी. यामुळे कार्बनचे कमीत-कमी उत्सर्जन होऊन पर्यावरणाचा समतोल राहू शकतो.

याचे सॅटेलाइटद्वारे मोज-माप करून शेतकऱ्यांना त्याचा मोबदला दिला जाऊ शकतो. जागतिक पातळीवर तसेच औद्योगिक क्षेत्रात काम सुरू आहे. गाताडवाडी व बोरगाव येथील पाणी पुरवठा योजनांच्या कार्यक्षेत्रात सामुदायिक सच्छिद्र पाइप निचरा प्रणाली राबवित आहोत.

ग्रो इंडिगो कंपनीचे तांत्रिक मार्गदर्शक उज्ज्वल पाटील म्हणाले, की या उपक्रमात सहभागी शेतकऱ्यांची मोबाइल ॲपद्वारे नोंदणी केली जाणार आहे. डी. एम. पाटील, मुख्य शेती अधिकारी प्रशांत पाटील आदी उपस्थित होते.ऊस विकास अधिकारी सुजय कुमार पाटील यांनी प्रास्ताविक केले. अमरसिंह साळुंखे यांनी आभार मानले.