NCP Political Crisis : राष्ट्रवादी कॉंग्रेस पक्षामध्ये अजित पवार यांच्या नेतृत्वाखाली गटाने बंडखोरी केल्यानंतर महाराष्ट्रातील सत्तासंघर्षाच्या दुसऱ्या अंकाची सुरुवात झाली आहे. यामध्ये अजित पवार गटाकडून जयंत पाटील यांना प्रदेशाध्यक्ष पदावरून हटवून सुनील तटकरे यांची निवड करण्यात आली. यानंतर शरद पवार यांच्या गटातर्फे जितेंद्र आव्हाड यांनी पत्रकार परिषदेत घेत प्रफुल्ल पटेल यांना पक्षांतर्गत निवड आणि निलंबन करण्याचे अधिकार नसल्याचे स्पष्ट केले.

राष्ट्रवादी काॅंग्रेसमध्ये अजित पवार यांनी बंड करत शिंदे-फडणवीस सरकारमध्ये उपमुख्यमंत्री पदाची शपथ घेतली. त्यानंतर शरद पवार यांनी बंडखोर आमदारांच्या विरोधात मैदानात उतरले आहे. जितेंद्र आव्हाड यांची पक्षप्रतोद आणि विरोधी पक्षनेते पदी निवड करण्यात आली. तसेच राष्ट्रवादी विधीमंडळाचे गटनेते जयंत पाटील यांनी अजित पवार यांच्यासह मंत्रिपदाची शपथ घेणाऱ्या ९ जणांवर अपात्रतेची कारवाई करण्यात यावी, अशी मागणी विधानसभेचे अध्यक्ष राहुल नार्वेकर यांच्याकडे करण्यात आली होती.

राष्ट्रवादीच्या सत्तासंघर्षानंतर अजित पवार गटही आक्रमक झाला. त्यांच्यावतीने जयंत पाटील आणि जितेंद्र आव्हाड यांच्यावर अपात्रतेची कारवाई करण्याबाबतचे पत्र विधानसभा अध्यक्षांकडे देण्यात आले. तसेच प्रफुल्ल पटेल यांनी प्रदेशाध्यक्ष पदावरून जयंत पाटील यांना हटवून सुनील तटकरे यांची निवड केली. तसेच प्रदेशाध्यक्षपदी सुनील तटकरे यांची नियुक्ती केली. महिला प्रदेशाध्यक्षपदी रुपाली चाकणकर यांनी निवड करण्यात आली आहे.

राष्ट्रवादी भवनामध्ये जितेंद्र आव्हाड यांनी पत्रकार परिषद घेत अजित पवार यांच्याकडून करण्यात आलेल्या निवडी आणि नियुक्त्या पक्षाच्या घटनेच्याविरोधात असून त्याला कोणताही अधिकारी नाही. कोणत्याही स्वरुपाच्या निवडी आणि निलंबन करण्याचे सर्वाधिकारी शरद पवार यांनाच आहे.

राष्ट्रवादीचे राष्ट्रीय अध्यक्ष शरद पवार यांनी प्रफुल पटेल आणि सुनील तटकरे यांची पक्षातून हकालपट्टी करण्यात आली आहे. ज्यांची राष्ट्रीय अध्यक्षांनी पक्षातून काढले त्यांनी इतर नियुक्त्या करणे कितपत योग्य हे कायदाच सांगेल. त्यामुळे त्यांनी केलेल्या सर्व निवडी बेकायदेशीर आहेत.