Pune News: गेल्या काही दिवसांपासून शरद पवार यांच्या नेतृत्वाखालील राष्ट्रवादी काँग्रेस शरद पवार गट आणि अजित पवार गट एकत्र येणार असल्याच्या चर्चा रंगल्या आहेत.

त्या पार्श्‍वभूमीवर राष्ट्रवादीचे शरद पवार गटाचे आमदार रोहित पवार यांनी सुप्रिया सुळे परदेशातून आल्यावर त्यावर भाष्य करतील, असे सूचक वक्तव्य केले आहे

‘दोन्ही राष्ट्रवादी एकत्र येणार का?’ असा प्रश्‍न पत्रकारांनी रोहित पवार यांना विचारल्यावर आमदार रोहित पवार म्हणाले, की हा प्रश्न जसा तुम्हाला पडला आहे तसाच अनेकांना पडला आहे. परंतु आजपर्यंतची ही फक्त चर्चा आहे. वरिष्ठ पातळीवरून आम्हाला याबाबत काही कळाले नाही, काही कळाल्यास तुम्हाला नक्की सांगू.

‘‘सुप्रियाताई काय भूमिका घेणार? हे बघावे लागेल. पक्षाची जबाबदारी सुप्रियाताई यांच्यावर आहे. त्यामुळे ताईच निर्णय घेतील. सुप्रियाताई सध्या परदेशात आहेत. मोदी यांनी अनेक पक्षाच्या नेत्यांवर जबाबदारी टाकली आहे.

सुप्रियाताई राजकारण बाजूला ठेवून भारतासाठी परदेशात गेल्या आहेत. त्या परदेशातून आल्यावर सविस्तर भाष्य करतील,’’ असे रोहित पवारांनी पत्रकारांशी बोलताना सांगितले.