Pune News : खेड तालुक्यात सध्या रब्बी हंगामातील तसेच उन्हाळी हंगामातील बाजरीची पिके जोरात आहेत. खेड तालुक्यात सुमारे सोळाशे हेक्टरवर बाजरीचे पीक घेतले जात आहे. यंदा पाणीटंचाई जाणवत असल्याने पिकाचे क्षेत्र जिल्ह्यात घटले आहे असे वास्तव आहे.

पुणे जिल्ह्यात पावसाळी खरीप हंगामात तसेच रब्बी व उन्हाळी हंगामात बाजरीचे पीक घेतले जाते. बाजरीला दिवसेंदिवस मागणी वाढलेली आहे. बाजरीचे दरही प्रतिकिलोला पंचवीस ते तीस रुपये घाऊक बाजारात आहेत.

बाजरीची भाकरी खाण्याकडे लोकांचा कल वाढतो आहे. शेतकरी पुन्हा बाजरी पीक घेण्याकडे मोठ्या प्रमाणात वळतो आहे. पुणे जिल्ह्यात खरीप हंगामात पावसाळ्यातील बाजरीचे पीक घेतले जाते तसेच रब्बी (हिवाळ्यात) हंगामात बाजरीचे पीक घेतले जाते.

त्यानंतर उन्हाळ्यात एप्रिल, मे, जून या तीन महिन्याच्या कालावधीत बाजरीचे पीक घेतले जाते. साधारणपणे बटाटा कांदा पिकाची काढणी केल्यानंतर काही शेतकरी बाजरीचे पीक घेतात. हे पीक साधारणपणे मे अखेरीस तसेच जूनच्या पहिल्या, दुसऱ्या आठवड्यात काढण्यास येते. पावसाळी बाजरी बरोबर उन्हाळी बाजरी ला महत्त्व येत आहे.