Chh. Sambhajinagar News : मराठवाड्यासह खानदेशातील मिळून पाच जिल्ह्यांतील १४ कारखान्यांचा ऊस गाळप हंगाम आटोपला आहे. तर आठ कारखान्यांचे ऊस गाळप मंगळवारपर्यंत (ता. ११) सुरूच होते. मजुरांबरोबरच हार्वेस्टरच्या साह्याने ऊस काढणी झाल्याने झपाट्याने कारखान्यांचे गाळप आटोपत असल्याची स्थिती आहे.

मराठवाड्यातील छत्रपती संभाजीनगर, जालना व बीड तसेच खानदेशातील नंदुरबार व जळगाव या पाच जिल्ह्यांत यंदा २२ कारखान्यांनी आतापर्यंत ऊस गाळप हंगामात सहभाग नोंदविला. त्यामध्ये १३ सहकारी तर ९ खासगी कारखान्यांचा समावेश आहे.

ऊस गाळप हंगाम आटोपलेल्या कारखान्यांमध्ये नंदुरबारमधील दोन जळगावमधील एक छत्रपती संभाजीनगरमधील पाच बीडमधील सहा कारखान्यांचा समावेश आहे. सुरू असलेल्या कारखान्यांमध्ये जालन्यातील चार, बीडमधील दोन व छत्रपती संभाजीनगरमधील दोन कारखान्यांचा समावेश आहे.

गाळपाची गती पाहता लवकरच इतरही कारखान्यांचा गाळप हंगाम आटोपण्याची चिन्हे आहेत. शिवाय गाळपासाठी उपलब्ध असलेला ऊस व साखरेचा उतारा लक्षात घेता साखरेचे अपेक्षित उत्पादन होण्याची शक्यता नाही.

८० लाख टन उसाचे गाळप

साधारणतः नोव्हेंबर, डिसेंबर ते जानेवारीच्या पहिल्या आठवड्यात कारखान्यांचे ऊस गाळप सुरू झाले होते. सर्व बावीस कारखान्यांनी मंगळवारपर्यंत (ता. ११) ७९ लाख ९८ हजार ९० टन उसाचे गाळप करत सरासरी ७.९८ टक्के साखर उताऱ्याने ६३ लाख ८४ हजार ९५ क्विंटल साखरेचे उत्पादन केले.

जिल्हा नंदुरबार

कारखाने २

ऊस गाळप ७८८१२० टन

साखर उत्पादन ५००९०० क्विंटल

साखर उतारा ६.३६ टक्के

जिल्हा जळगाव

कारखाने १

ऊस गाळप १०४३२९ टन

साखर उत्पादन १०५०५० क्विंटल

साखर उतारा १०.०७

जिल्हा छत्रपती संभाजी नगर

कारखाने ७

ऊस गाळप १८३२४७७ टन

साखर उत्पादन १८५६२८९ क्विंटल

साखर उतारा १०.१३ टक्के

जिल्हा जालना

कारखाने ४

ऊस गाळप २०९७३८६ टन

साखर उत्पादन १७६०१४० क्विंटल

साखर उतारा ८.३९ टक्के

जिल्हा बीड

कारखाने ८

ऊस गाळप ३१७५७७९ टन

साखर उत्पादन २१६१७१६ क्विंटल

साखर उतारा ६.८१ टक्के