Chhatrapati Sambhajinagar: कांचनवाडी येथील छत्रपती शाहू महाराज शिक्षण संस्था संचलित छत्रपती शाहू अभियांत्रिकी महाविद्यालयाच्या ट्रेंडक्राफ्टर्स (TrendCrafters) या विद्यार्थ्यांच्या गटाने पहिल्या आंतरराष्ट्रीय कृषी हॅकेथॉन स्पर्धेत आंतरराष्ट्रीय स्तरावर द्वितीय क्रमांकाचे १५ लाखांचे पारितोषिक पटकावले.

हा पुरस्कार केंद्रीय कृषिमंत्री शिवराजसिंह चव्हाण, मुख्यमंत्री देवेंद्र फडणवीस व उपमुख्यमंत्री अजित पवार यांच्या हस्ते प्रदान करण्यात आला. कृषी आणि तंत्रज्ञान क्षेत्रात नावीन्यपूर्ण प्रकल्पांना प्रोत्साहन देण्यासाठी आयोजित या स्पर्धेत जगभरातून सुमारे ८०० हून अधिक प्रोजेक्ट्सची नोंदणी झाली होती.

यापैकी १४० प्रोजेक्ट्सची अंतिम स्पर्धेसाठी निवड करण्यात आली, ज्यामध्ये छत्रपती शाहू महाराज शिक्षण संस्थेच्या छत्रपती शाहू अभियांत्रिकी महाविद्यालयाच्या एकूण ३२ विद्यार्थी व ०३ प्राध्यापक वृंद यांच्यासह ८ गट सहभागी झाले होते.

यामध्ये महाविद्यालयाच्या ‘ट्रेंडक्राफ्टर्स’ गटाने सादर केलेल्या प्रकल्पाने द्वितीय क्रमांक पटकावला. या अभिनव प्रकल्पात आर्टिफिशियल इंटेलिजन्सच्या माध्यमातून स्थानिक बाजारातील पीक दरांचे विश्लेषण करून, शेतकऱ्यांना संभाव्य किमतींचा अंदाज व स्मार्ट निर्णय घेण्यासाठी मदत केली जाते.

यामुळे शाश्वत व फायदेशीर शेतीस चालना मिळणार आहे. या संपूर्ण प्रक्रियेत प्रा. डॉ. अश्विनी गवळी यांनी मार्गदर्श म्हणून महत्त्वाची भूमिका बजावली. उल्लेखनीय यशाबद्दल संस्थेचे अध्यक्ष रणजित मुळे आणि सचिव पद्माकरराव मुळे यांनी विद्यार्थ्यांचे कौतुक केले.