Nashik News : गेल्या तीन दिवसांपासून जिल्ह्याच्या विविध भागांत वादळी वाऱ्यासह पावसाने नुकसान आहे. यामध्ये प्रामुख्याने चांदवड, दिंडोरी, कळवण व नाशिक तालुक्यांना पावसाने फटका दिला. त्यातच सोमवारी (ता. १३) देवळा तालुक्यात वादळी वारे, विजांच्या कडकडाटासह झालेल्या पावसाने कांद्याच्या शेड जमीनदोस्त झाले. तर अनेक घरांचे व गोट्यांचे पत्रे उडाल्याने शेतकऱ्यांचे नुकसान झाले.

जिल्ह्याच्या विविध भागांत भारतीय हवामान विभागाने वादळी वाऱ्यासह पावसाचा अंदाज वर्तवला होता. त्यानुसार गेल्या तीन दिवसांत पावसाने शेतकऱ्यांची धावपळ उडवली आहे. त्यातच देवळा तालुक्यातील वाजगाव, हंगा वस्ती, मटाने, रामेश्वर या गावात येथे शेतकऱ्यांना मोठा फटका बसला.

यंदा पाऊस कमी असल्याने या भागात कांदा लागवडी कमी होत्या. शेतकऱ्यांनी कांदा काढणी करून तो चाळीत साठवला होता. मात्र चाळीचे पत्रे उडून गेले. वादळी वाऱ्यासह पाऊस व नंतर गारपीटही काही प्रमाणात झाली. तर ढगाळ वातावरण मंगळवारी (ता. १४) कायम असल्याने शेतकऱ्यांची धाकधूक वाढली आहे.

मध्यरात्री वाऱ्याचा वेग अधिक असल्याने अनेक घरांवरील, कांदा चाळीचे पत्रे उडून गेले. काही ठिकाणी साठवलेला कांदा भिजल्याने सडण्याची शक्यता आहे. अनेक ठिकाणी शेतकऱ्यांनी आंबा लागवडी केल्या आहेत. या वादळी वाऱ्यात कैऱ्या गळून पडल्या. झाडे जमीनदोस्त झाली.

कांदा शेडचे अधिक नुकसान

वादळी वाऱ्यासह झालेल्या पावसाने अनेक ठिकाणी कांदा व्यापाऱ्यांचे शेड भूईसपट झाले आहेत. त्यामुळे कांद्याचे अधिक नुकसान झाल्याचे समोर आले आहे. अशा परिस्थितीत लाखो रुपयांचे नुकसान झाल्याने शेतकऱ्यांसह कांदा व्यापाऱ्यांच्या अडचणीत वाढ झाल्याने ‘दुष्काळात तेरावा महिना' अशी परिस्थिती आहे.