Jalgaon News : खानदेशात मागील आठवड्यात किंवा काही दिवसांत अनेक वादळी पाऊस झाला आहे. यात सर्वत्र केळी, भाजीपाला व चाऱ्याची नासाडी, हानी झाली आहे. परंतु पंचनामे टक्केवारीच्या खेळात अडकलेले असतानाच काही भागात पंचनामेच झाले नाहीत. कमी नुकसान किंवा ३३ टक्क्यांपर्यंत नुकसान न झाल्याने हे पंचनामे प्रशासनाने टाळल्याची स्थिती आहे.

अनेक गावे या प्रकाराने नुकसान भरपाईपासून वंचित राहतील. पारोळा, अमळनेर, चोपडा आदी भागात नुकसान झाल्याचा अहवाल प्रशासनाने जळगावात तयार केला. पण अन्य भागातही नुकसान झाले. तसेच धुळ्यासह नंदुरबारातही असाच प्रकार झाला.

तलाठ्यांवर अधिकचा कार्यभार

एका तलाठ्यावर चार ते पाच गावांचा कार्यभार आहे. अनेक भागात रिक्त पदे आहेत. जेथे तलाठी आहे, तेथे कृषी सहायक नाही तर जेथे कृषी सहायक होते, तेथे तलाठी नसल्याने पिकहानीचे पंचनामे करताना धरसोडीचा प्रकार झाल्याच्या तक्रारी आहेत. जळगाव जिल्ह्यातील पाचोरा, भडगाव, चाळीसगाव, जामनेर, बोदवड, मुक्ताईनगर, यावल, रावेर, जळगाव, चोपडा, धुळ्यातील शिरपूर, नंदुरबारातील शहादा, तळोदा, अक्कलकुवा, नंदुरबार अशा सर्वच भागातून पंचनामे व्यवस्थितपणे झालेच नाही, अशा तक्रारी आहेत.

काही भागात नुकसान ३० टक्केही नाही, अशी बतावणी करून महसुली कर्मचारी पंचनाम्यांसाठी पोचलेच नाही. तर जेथे पंचनामे सुरू झाले, तेथे कमी मनुष्यबळाची अडचण होती. जामनेर, जळगाव, चोपडा, पाचोरा व अन्य भागात विविध पिकांची हानी झाली आहे. महसूल व कृषी विभागाने संयुक्त पंचनामे करून आपला अहवाल लागलीच सादर करणे आवश्यक असते.

तसेच अतिजोरदार पाऊस झाल्यास लागलीच पाहणी करून माहिती देणे अनिवार्य आहे. तलाठी गावोगावी पोचलेच नाही. अनेक गावांत सलग तीन दिवस जोरदार पाऊस झाला आहे. नंदुरबारात काही भागात सलग चार दिवस अतिजोरदार पाऊसही झाला आहे. यामुळे नुकसान झाले असून, शेतकरी सरसकट भरपाईची मागणी करीत आहेत.