Kolhapur News : चालू खरीप हंगामातील शेतीमाल किमान आधारभूत किमतीने खरेदी करण्यासाठी आठवडा बाजारच्या ठिकाणी शासकीय खरेदी केंद्रे सुरू करावीत, अशी मागणी भारतीय शेतकरी कामगार पक्षाने केली आहे.

नायब तहसीलदार राजेंद्र यादव यांना निवेदन देऊन तालुका चिटणीस वसंत कांबळे, भरत सुतार, लक्ष्मण नाईक, जयवंत दळवी, व्हळ्याप्पा कांबळे, राजेश कांबळे यांच्या शिष्टमंडळाने या विषयाकडे त्यांचे लक्ष वेधले.

दोन निवडणुकांमध्ये स्वामिनाथन अहवाल स्वीकारून त्याची अंमलबजावणी करण्याचे वचन सरकारने दिले होते. परंतु अद्याप कोणतीही कार्यवाही झालेली नाही. बाजारातील साखरेचे दर गृहीत धरून ‘एफआरपी’पेक्षा किमान पाचशे रुपये अधिक दर देण्यास कारखानदारांना भाग पाडावे,

‘एफआरपी’चे सुसूत्रीकरण करावे, जलसंपत्ती प्राधिकरणचे घनमापन पद्धतीने शेतीसाठी पाणीपट्टी आकारण्याचे धोरण रद्द करून पूर्वीप्रमाणेच पाणीपट्टीची आकारणी करावी, शेतीसाठी सलग दहा तास वीजपुरवठा व्हावा,

शेतीपंपांसाठी सरासरीऐवजी मीटर पद्धतीने बिलिंग सुरू करावे, अनियमित पावसाने झालेल्या पीक नुकसानीचे पंचनामे करावेत, आदी मागण्या पक्षाच्या वतीने निवेदनात करण्यात आल्या आहेत. मागण्यांकडे गांभीर्याने बघण्याची मागणी या वेळी करण्यात आली.