Jalna Maratha protest : जालना जिल्ह्यात मराठा आरक्षणासाठी ( maratha reservation) आंदोलन करणाऱ्यांवर पोलिसांकडून लाठीचार्ज करण्याची घटना घडली. या घटनेच्या निषेधार्थ राज्यभरात मराठा समाज (maratha community ) रस्त्यावर आला असून शुक्रवारी रात्री छत्रपती संभाजीनगरमध्ये एसटी बस पेटवून दिल्या. तसेच काही जिल्ह्यामध्ये बसवर दगडफेक करून काचा फोडण्यात आल्या. जालना, बीड, छत्रपती संभाजीनगर आणि अहमदनगर जिल्ह्यातील आगारातून सुटणाऱ्या गाड्या रद्द करण्यात आल्या. त्यामुळे प्रवाशांचे हाल होत आहेत.

आंदोलकांवर झालेल्या लाठीचार्जनंतर मराठा समाज आक्रमक झाला आहे. या घटनेच्या निषेधार्थ जालना, बीड, उस्मानाबाद, नंदूरबार, हिंगोली, परभणी आणि लातूरमध्ये बंदची हाक देण्यात आली आहे. छत्रपती संभाजीनगर आगारातून शुक्रवारी रात्रीपासून बीड, लातूर, सोलापूर, कोल्हापूर, कर्नाटक आणि आंध्रप्रदेशात जाणाऱ्या बसेस स्थानकात थांबवल्यात आल्या.

धुळे-सोलापूर रोडवर एसटी महामंडळाच्या (ST Corporation)बसला आग लावण्यात आली होती. त्याची खबरदारी म्हणून संगमनगर आगारमधील सर्व बसेस बंद ठेवण्यात आल्या. तसेच अहमदनगर, सोलापुरातून मराठवाड्याकडे जाणारी एसटी पूर्णपणे बंद करण्यात आली आहे. राज्य परिवहन मंडळाच्या सोलापूर विभागातील ५४ फेऱ्या सकाळपासून रद्द करण्यात आल्या आहेत. नंदुरबार जिल्ह्यात मराठा क्रांती मोर्चाच्या वतीने आंदोलन करण्यात आले. एसटी महामंडळाच्या बसेस देखील आज बंद ठेवण्यात आल्या आहेत.

राज्यभरातील सर्व बसस्थानकात कुठलाही अनुचित प्रकार घडवून यासाठी मोठा पोलीस बंदोबस्त तैनात करण्यात आल्याचे दिसून येत आहे. अनेक बसस्थानकात लांबपल्ल्यांच्या गाड्या रद्द करण्यात आल्याने प्रवाशांचे प्रचंड हाल झाले. या स्थितीचा रिक्षा चालकांनी गैरफायदा घेतला. जादा भाडे आकारून त्यांनी प्रवाशांची लूट सुरू केल्याचे चित्र आहे.