Yavatmal News : बिगर शेती कर्ज थकित असलेली टॉप दीडशे थकबाकीदारांची नावे गेल्या अनेक वर्षांपासून काढण्यात आलेली आहेत. अजूनही यांच्याकडून वसुली झालेली नाही. त्यामुळे आता या थकबाकीदारांकडील वसुली करण्यासाठी विशेष बैठक घेण्याचा निर्णय जिल्हा मध्यवर्ती सहकारी बँकेच्या संचालक मंडळाच्या बैठकीत घेण्यात आला.

जिल्हा मध्यवर्ती सहकारी बँकेचे अध्यक्ष मनीष पाटील यांच्या अध्यक्षतेखाली संचालक मंडळाची ही बैठक झाली. टॉप दीडशे थकबाकीदारांचा आढावा व इतर विषयपत्रिकेवर होते. बिगरशेती कर्जाची वसुली करण्याचा निर्णय जिल्हा बँकेने घेतला होता.

मात्र, त्या प्रकरणांतही वसुलीची गती कमी दिसत आहे. आता संचालक मंडळाने पुन्हा कर्जवसुलीची मोहीम हाती घेतली आहे. संचालक मंडळाच्या बैठकीत या प्रकरणांतील वसुली व सद्यःस्थितीबाबत आढावा घेण्यात आला.

बँकेची स्थिती अडचणीची असल्याने वसुली हा एकमेव पर्याय बँकेपुढे आहे. त्यामुळे आता वसुलीसाठी बँक आग्रही आहे. संचालक मंडळाच्या बैठकीत याच थकित वसुलीसाठी संचालकांनी आग्रह धरला. त्यामुळे आता येणाऱ्या काळात थकित कर्जवसुलीला गती येण्याची शक्यता वर्तविण्यात येत आहे.

या प्रकरणाचा सविस्तर आढावा व वसुली मोहिमेबाबत निर्णय घेण्यासाठी विशेष बैठक घेण्याचा निर्णय संचालक मंडळाने घेतला आहे. याशिवाय बैठकीत कर्मचाऱ्यांच्या पदोन्नतीबाबतही चर्चा करण्यात आली.