Jalgaon News : खानदेशात सोयाबीनची पेरणी यंदा काहीशी वाढली आहे. पेरणी सुमारे ४५ हजार हेक्टरवर झाली आहे. एकट्या जळगाव जिल्ह्यातील पेरणी सुमारे २५ हजार हेक्टरपर्यंत असल्याची माहिती आहे. धुळे व नंदुरबारात सोयाबीनची पेरणी कमी असते. या भागात शेतकऱ्यांनी सोयाबीनऐवजी मका, कापूस आदी पिकांना पसंती दिली आहे.

सोयाबीनचे उत्पादन वाढेल, अशी अपेक्षा आहे. बियाणे उगवण कमी होईल, अशी भीती शेतकऱ्यांना होती. पण पाऊस पेरणीच्या वेळेस बरा होता. यामुळे उगवण बऱ्यापैकी झाली. पण आता पावसाची गरज आहे.

जळगाव जिल्ह्यात सोयाबीनची पेरणी मागील महिन्यातच बऱ्यापैकी झाली आहे. त्यात कमी कालावधीत येणाऱ्या वाणांना पसंती देण्यात आली आहे. काही शेतकऱ्यांनी तुषार सिंचन, ठिबकच्या माध्यमातून सोयाबीनचे सिंचन करण्याची व्यवस्था केली आहे.

सोयाबीनची पेरणी धुळे, नंदुरबारात वाढण्याची शक्यता फारशी नव्हती. या दोन्ही जिल्ह्यांत १५ हजार १०० हेक्टरवर सोयाबीन पीक आहे. जळगाव जिल्ह्यात सोयाबीनची पेरणी १८ ते १९ हजार हेक्टरवर अपेक्षित होती. परंतु पेरणी वाढली आहे. पेरणीच्या सुरवातीलाच अनेकांनी केली होती. काही शेतकऱ्यांचे पीक बऱ्यापैकी दिसत आहे.

पण कमी पावसाचा फटका बसू लागला आहे. पिकात एक वेळेस रासायनिक खतही अनेकांनी दिले आहे. कसदार जमिनीतील पीक चांगले असून, वाढ होत आहे. अनेक शेतकऱ्यांनी फळबागांमध्ये आंतरपीक म्हणून सोयाबीनची पेरणी केली आहे. .

काळ्या कसदार जमिनीत पीक तग धरून

सोयाबीनची पेरणी गिरणा, तापी, वाघूर नदीच्या क्षेत्रात झाली आहे. या भागात कमी पावसातही पीकस्थिती बरी आहे. कारण काळ्या कसदार जमिनीत पीक तग धरते. जळगाव जिल्ह्यात सोयाबीन रावेर भागात कमी आहे.

परंतु यावल, चोपडा, पाचोरा, जामनेर, भडगाव, चाळीसगाव, धरणगाव, जळगाव, अमळनेर, धुळ्यातील शिरपूर, नंदुरबारातील शहादा, तळोदा भागात सोयाबीन आहे. सोयाबीन पीक अनेकांचे ३० ते ४० दिवसांचे झाले आहे. काहींचे पीक फूटभर उंचीचे झाले आहे.