Pune News : भारतातून एप्रिल ते ऑगस्ट दरम्यान १९ लाख ४५ हजार टन तेलबियापेंड निर्यात झाली. मागील वर्षी याच याच काळात झालेल्या निर्यातीच्या तुलनेत यंदाची निर्यात ४ टक्क्यांनी कमी झाली आहे. तर सोयापेंड निर्यात ८ लाख ४८ हजार टन झाली होती. मागीलवर्षीच्या तुलनेत सोयापेंड निर्यात जवळपास दुप्पट झाली. साॅल्व्हेंट एक्सट्राक्टर्स असोसिएशन ऑफ इंडियाने ही माहिती दिली. 

ऑगस्ट महिन्यातही तेलबिया पेंड निर्यात घटली आहे. भारतातून ऑगस्टमध्ये ३ लाख १४ हजार टन तेलबिया पेंड निर्यात झाली. तर २०२३ च्या ऑगस्टमधील तेलबिया पेंड निर्यात ३ लाख ५४ हाजर टन झाली होती. म्हणजेच यंदाच्या ऑगस्टमधील निर्यात ४० हजार टनांनी कमी होती. दक्षिण कोरिया भारताच्या तेलबिया पेंड आयात करणारा मोठा देश ठरला. दक्षिण कोरियाने एप्रिल ते ऑगस्ट दरम्यान ३ लाख ३८ हजार टनांची आय़ात केली होती. दक्षिण कोरियाने अडीच लाख टन मोहरी पेंड आयात केली, ६४ हजार टन एरंडी पेंड आणि २४ हजार टनांची सोयापेंड आयात केली. 

दक्षिण कोरियानंतर व्हिएतनामने जास्त तेलबिया पेंड आयात केली. मागील ५ महिन्यात व्हिएतनामने १ लाख १३ हजार टनांची आयात केली होती. यात ९३ हजार टन मोहरी पेंड आयात केली. तर साडेसात हजार टन सोयापेंड आणि दोन हजार टन शेंगदाणा पेंड आयात केली होती. थायलंडने १ लाख ८१ हजार टनांची आयात केली. यात १ लाख ७९ हजार टन मोहरी पेंड आणि ३ हजार टन सोयापेंडची आयात केली होती. 

भारताने एप्रिल ते ऑगस्ट या ५ महिन्यांमध्ये ८ लाख ८४ हजार टन मोहरी पेंड निर्यात केली होती. मागीलवर्षी याच काळातील मोहरी पेंड निर्यात ११ लाख ५५ हजार टन निर्यात झाली होती. बांगलादेश आणि दक्षिण कोरियाला मोहरी पेंड निर्यात जास्त झाली होती. एरंडी पेंड निर्यात १ लाख १६ हजार टनांची झाली होती. तर गेल्यावर्षी १ लाख ४६ हजार टनांची निर्यात झाली होती. 

सोयापेंड निर्यात वाढली

मागील पाच महिन्यात ८ लाख ४८ हजार टन सोयापेंड निर्यात झाली होती. मागीलवर्षी याच काळातील सोयापेंड निर्यात ४ लाख ८१ हजार टनांची निर्यात झाली होती. मागील ५ महिन्यात इराण आणि फ्रान्स या दोन देशांनी सर्वाधिक सोयापेंड आयात केली. इराणने १ लाख १४ हजार टनांची आयात केली. तर फ्रान्सने ८३ हजार ६०३ टन आयात केली होती.