Solapur News : राज्य शासनाच्या एक तालुका, एक बाजार समिती या धोरणानुसार सोलापूर जिल्ह्यात दक्षिण सोलापूर तालुक्यात स्वतंत्र बाजार समितीची निर्मिती होणार आहे. राज्य शासनाने नव्याने ६५ बाजार समित्या घोषित केल्या आहेत.

त्यात सोलापूर जिल्ह्यातून दक्षिण सोलापूरची एकमेव निवड करण्यात आली आहे. राज्यात सध्या ३०५ बाजार समित्या आहेत. या बाजार समित्यांचे ६२५ उपबाजार आहेत. त्यात आता नव्याने आणखी ६५ तालुक्यात बाजार समित्या निर्मिल्या जाणार आहेत.

मुख्यमंत्री शंभर दिवस कृती कार्यक्रमात हा निर्णय घेण्यात आला आहे. मुख्यमंत्री देवेंद्र फडणवीस यांच्यासमोरही याबाबतचे सादरीकरण झाले आहे. यंदाच्या अर्थसंकल्पावेळीही बोलताना राज्याचे उपमुख्यमंत्री अजित पवार यांनी याबाबतची माहिती दिली होती.

या निर्णयामुळे सोलापूर बाजार समितीचे विभाजन होणार असून, सध्या या बाजार समितीत उत्तर सोलापुरातील ३८ आणि दक्षिण सोलापुरातील ९० गावे समाविष्ट आहेत.

या बाजार समितीमुळे दक्षिण सोलापूरसाठी स्वतंत्र बाजार समितीसाठी आणि त्याच्या विकासासाठी १० ते १५ एकर जागा लागणार आहे. लवकरच या संबंधीची पुढील कार्यवाही होईल, असे पणन विभागाकडून सांगण्यात आले.