Solapur News : सोलापूर मंडलाची वीजहानी सर्वाधिक २८.३१ टक्के आहे. हे चित्र गंभीर आहे. प्रत्येक विभागात कायमस्वरूपी वीजपुरवठा खंडित असलेल्या जोडण्यांच्या तपासणीसाठी मोहीम राबवा. तसेच वीजचोरी आढळल्यास त्वरीत कारवाई करा, अशी सूचना महावितरणचे अध्यक्ष, व्यवस्थापकीय संचालक लोकेश चंद्र यांनी दिली.

गुरुवारी (ता. २४) येथील नियोजन भवनात पुणे, कोल्हापूर व बारामती परिमंडलातील विविध कामे, योजनांचा त्यांनी आढावा घेतला. यावेळी ते बोलत होते. ते म्हणाले, वीज ग्राहकांना सुरळीत व दर्जेदार वीजपुरवठा देण्याच्या कामात हयगय करू नका.

पश्चिम महाराष्ट्रात औद्योगिक वसाहतींसह सर्व भागात वीज वितरण यंत्रणेच्या विस्तारीकरण व सक्षमीकरणाची कामे वेगाने सुरू आहेत. त्यामुळे वारंवार वीज खंडित होणाऱ्या प्रकारांची गंभीर दखल घेतली जाईल. कालावधीत सेवा देण्यासाठी सजग राहा. तसेच वाढती थकबाकी कमी करण्यासाठी वीजबिलांच्या वसुलीला आणखी वेग द्या.

पायाभूत यंत्रणेच्या सक्षमीकरणासाठी स्थानिक आराखडे बनवून कामांना वेग द्या. काही दिवसांत वीजपुरवठा खंडित होण्याचे प्रमाण वाढले आहे, ही गंभीर बाब आहे. सुरळीत वीजपुरवठ्यासाठी ताबडतोब उपाययोजना करा. पूर्वनियोजित देखभाल व दुरुस्तीच्या कामांसाठी वीज बंद ठेवण्याचा कालावधी कमी करावा.

त्याबाबत ग्राहकांना एसएमएसद्वारे पूर्वसूचना द्या. तसेच गेल्या एप्रिलपासून वीजबिलांच्या थकबाकीमध्ये सातत्याने वाढ होत आहे. महसूलाच्या उद्दिष्टानुसार बिलांची वसूली झालेली नाही, ही बाबही गंभीर आहे. वसूलीमध्ये हयगय केल्यास कारवाईला सामोरे जावे लागेल, असा इशाराही त्यांनी दिला.

औद्योगिक वीजदर होणार कमी

सोलापूर जिल्ह्यातील उद्योजकांशी लोकेश चंद्र यांनी संवाद साधला. गेल्या अडीच वर्षांमध्ये ऊर्जा क्षेत्रातील कामगिरीमुळे राज्यात प्रथमच वीज दरात कपात झाली आहे. त्याचा फायदा औद्योगिक ग्राहकांनाही निश्चितपणे होणार आहे. पुढील पाच वर्षांमध्ये लघु व उच्चदाबाच्या औद्योगिक वीजदरात घट होत जाणार असल्याची माहिती त्यांनी दिली.