Washim News : शेती आणि शेतकऱ्यांसाठी सातत्याने नावीन्यपूर्ण उपक्रम राबविणाऱ्या वाशीम जिल्हा प्रशासनाने आगामी खरीप हंगामासाठी आणखी एक नवी स्पर्धा आणली आहे. ‘वत्सगुल्म स्मार्ट पेरणी स्पर्धा - खरीप २०२५’ असे याचे नाव आहे. शेतकऱ्यांचे खरीप हंगामातील उत्पादन व पर्यायाने उत्पन्न वाढविण्याच्या उद्देशाने नावीन्यपूर्ण पाऊल उचलण्यात आले.

उत्पादन वाढीसाठी पेरणी हा महत्त्वाचा घटक ठरतो. आधुनिक व वैज्ञानिक दृष्टिकोनातून स्मार्ट पेरणी पद्धतींची लोकप्रियता वाढवण्याच्या उद्देशाने ही स्पर्धा तयार करण्यात आली. यापद्धतींद्वारे जमिनीची सुपीकता, पाण्याचे योग्य व्यवस्थापन आणि उत्पादनात वाढ साधता येईल.

शेतकरी प्रशासनाने नेमून दिलेल्या कोणत्याही एका स्मार्ट पद्धतीने कोणत्याही पिकाची पेरणी करून स्पर्धेत सहभागी होऊ शकतात. यात प्रामुख्याने रुंद वरंबा सरी पेरणी (BBF), सरी वरंब्यावर टोकण लागवड, अमर पट्टा पद्धत (मिश्र पिकं - जसे की सोयाबीन + तूर), हस्तचालित टोकण यंत्राद्वारे पेरणी व मृत सरी काढणे याचा समावेश आहे.

बक्षीस व निवड प्रक्रिया

स्पर्धेसाठी नोंदणीसाठी कोणतेही अर्ज आवश्यक नाहीत. क्यूआर कोड स्कॅन करून गूगल फॉर्म भरावा लागेल. फॉर्म सादर करणाऱ्या शेतकऱ्यांपैकी १८ शेतकऱ्यांची लकी ड्रॉद्वारे निवड होईल. त्यांच्या शेतांची प्रत्यक्ष पाहणी करण्यात येईल, आणि अचूक माहिती दिलेल्या शेतकऱ्यांनाच १५ ऑगस्ट २०२५ रोजी पारितोषिक व सन्मानपत्र देण्यात येईल. या स्पर्धेसाठी इंडियन फार्मर्स फर्टिलायझर को-ऑपरेटिव्ह लिमिटेड (इफको) ने सहकार्य केले आहे.

फायदे

जलसंधारण आणि मृदसंधारण सुनिश्चित होते व ज्यामुळे जमिनीत जास्त दिवस ओलावा टिकून राहतो. अतिरिक्त पाणी सरीतून वाहून जाते. पाणी साचून नुकसान होत नाही.

बियाण्यांची बचत होते. कमी जास्त पाऊस झाल्यास बियाणे खराब होत नाही. झाडांना हवा खेळती मिळते

उत्पादन व निव्वळ उत्पन्नात लक्षणीय वाढ होते.

स्पर्धेचे वेळापत्रक

या स्पर्धेचे बक्षीस वितरण १५ ऑगस्ट रोजी जाईल. अधिक माहिती गावातील सहाय्यक कृषी अधिकारी, उप कृषी अधिकारी किंवा तालुका कृषी अधिकारी यांच्याशी संपर्क साधून मिळवता येईल. सागर कव्हर (८९७५९५७५९१) या क्रमांकावर व्हाट्सअ‍ॅप संदेश पाठवून विशेष माहिती व मार्गदर्शनासाठी ग्रुपमध्ये सहभागी होता येईल.