Akola News: श्री दत्तात्रय अर्बन मल्टीस्टेट को-ऑप क्रेडीट सोसायटीला केंद्र शासनाच्या सहकार विभागाने मल्टीपर्पज व अॅग्री मल्टीपर्पज असा दर्जा दिल्याने संस्था आगामी काळात या क्षेत्रात काम करेल, असे प्रतिपादन बँकेचे अध्यक्ष जगदीश मुरूमकर यांनी केले.

बँकेला मिळालेल्या या नवीन परवान्यांची माहिती देण्यासाठी संस्थेच्या वतीने पत्रकार परिषद घेण्यात आली, त्यावेळी ते बोलत होते. श्री. मुरूमकर पुढे म्हणाले, की संस्थेने आपल्या यशस्वी कार्याचा ३१ वर्षांचा टप्पा पूर्ण केला आहे.

१९९४ साली अकोला जिल्ह्यातील शिवर या लहानशा गावातून सुरू झालेली ही संस्था आज बहुराज्यस्तरीय आर्थिक संस्थेच्या रूपात विकसित झाली आहे. सुरुवातीस जिल्हा स्तरावर कार्यरत असलेली ही संस्था २०१५ पासून महाराष्ट्र व कर्नाटकांत कार्यक्षेत्र विस्तारत सहकार विभागाकडून मल्टीस्टेट दर्जाने मान्यता प्राप्त करत पुढे आली.

सध्या संस्थेच्या एकूण ११ शाखा असून अकोला, बुलडाणा आणि वाशीम येथे संस्थेचे जाळे विस्तारले आहे. संस्थेकडे सध्या १०० कोटी रुपयांच्या ठेवी असून, त्यापैकी ६० टक्के रक्कम कर्ज स्वरूपात वितरित करण्यात आली आहे. संस्था अनेक सामाजिक, शैक्षणिक व आरोग्यविषयक उपक्रमांत सक्रियपणे सहभागी असून अकोला मधील अग्रगण्य सहकारी संस्था म्हणून ओळखली जाते.