Nagar News : ‘नगर, नाशिक जिल्ह्यात खरिपात पिकांचे नुकसान झाले. रब्बीची पिके येतील की नाही याची शाश्वती नाही. याउलट जायकवाडी लाभक्षेत्रात स्थिती आहे. जायकवाडीत पुरेसे पाणी आहे. मृतसाठाही मोठा आहे. तरीही पाणी सोडण्याचा घाट घातला जात आहे. लाभक्षेत्रात दुष्काळजन्य परिस्थिती आहे का?

पाण्याची कमतरता आहे का? हे काहीच पाहिले जात नाही.पाण्याची कमतरता तयार होणार नाही, तोपर्यंत उच्च न्यायालयाच्या आदेशाप्रमाणे पाणी सोडता येणार नाही,’’ अशी भूमिका कोपरगावचे आमदार आशुतोष काळे यांनी मांडली.

काळे म्हणाले,‘‘कुठलीही बाब न पाळता पाणी सोडण्याचा निर्णय करून उच्च न्यायालयाच्या २३ सप्टेंबर २०१६ च्या निकालाचा एकप्रकारे अवमान केला आहे. नगर, नाशिक भागातून पाणी सोडू नये म्हणून आंदोलने होत आहेत.’’

मराठवाड्यातून सर्वोच्च न्यायालयात हस्तक्षेप याचिका

न्यायालयाच्या आदेशाच्या विरोधात नगर जिल्ह्यातील साखर कारखान्यांनी समन्यायी पाणी वाटपाच्या विरोधात सर्वोच्च न्यायालयात याचिका दाखल केल्या आहेत. या याचिकेच्या सुनावणीत मराठवाड्याची बाजू मांडण्यासाठी मराठवाडा असोसिएशन ऑफ स्मॉल स्केल इंडस्ट्रीज (मसिआ) व माजी आमदार डॉ. कल्याण काळे यांनी सर्वोच्च न्यायालयात स्वतंत्र हस्तक्षेप अर्ज दाखल केले आहेत. त्यावर आज (ता. २१) सुनावणी होईल.