Nashik News : केंद्र सरकारच्या ग्राहक व्यवहार विभागाच्या भाव स्थिरीकरण निधी योजनेअंतर्गत होणाऱ्या ‘नाफेड’च्या कांदा खरेदीचा मुद्दा लोकसभा निवडणुकीनंतर विधानसभेच्या प्रचारात गाजला.

दरम्यान, नवनियुक्त व्यवस्थापकीय संचालक दीपक अगरवाल यांनी बुधवारी (ता. २०) विधानसभा निवडणुकीच्या दिवशी नाशिक जिल्ह्यात विविध ठिकाणी जाऊन कांदा साठविलेल्या गोदामांची पाहणी केली. त्यामुळे ‘नाफेड’ कांदा खरेदी गैरव्यवहारांची गांभिर्याने चौकशी होत असल्याचे दिसून येत आहे.

केंद्राच्या पथकांच्या पाठोपाठ ‘नाफेड’ने एक सदस्यीय समिती व वरिष्ठ अधिकाऱ्यांना चौकशीसाठी दुसऱ्यांदा पाठविल्याने या गैरव्यवहाराचा गांभीर्याने तपास केला जात आहे, असे दिसत आहे.

माहिती देण्यास नेहमीप्रमाणे टाळाटाळ

व्यवस्थापकीय संचालक अगरवाल यांच्यासोबत ‘नाफेड’च्या पश्‍चिम विभागाच्या प्रमुख विना कुमारी आल्या होत्या. मात्र दौऱ्यात काय घडले, कुठे पाहणी केली या बाबत त्यांना संपर्क साधला असता त्यांनी अधिक बोलणे टाळले. त्यातच गेल्या दोन वर्षांपासून नाशिकमध्ये कांदा खरेदीची जबाबदारी पाहणारे शाखेचे व्यवस्थापक निखिल पाडदे निलंबित झाल्याचे समजते.

त्यांच्या जागेवर ‘नाफेड’चे संस्थात्मक पुरवठा व कांदा खरेदी विभागाचे सरव्यवस्थापक शंकर श्रीवास्तव यांच्याकडे प्रभारी कार्यभार देण्यात आला आहे. एकीकडे खुद्द अध्यक्ष जेठाभाई अहीर हे ‘नाफेड’मधील गैरव्यवहार समोर आणून त्याची माहिती देतात; मात्र अधिकारी व संबंधित माहिती देण्यास टाळाटाळ करत असल्याचे सातत्याने समोर येत आहे.