Sindhudurg News : सिंधुदुर्गनगरी ः काजू बागायतदारांसह सुपारी, नारळ उत्पादक विविध समस्यांमुळे मेटाकुटीस आले असून त्यांच्या समस्यांकडे गांभीर्याने लक्ष द्यावे, अशी मागणी फळबागायतदार संघाच्या वतीने काजू बोर्डाचे संचालक डॉ. परशुराम पाटील यांच्याकडे करण्यात आली आहे.

काजू बोर्डाचे संचालक डॉ. पाटील हे सिंधुदुर्गातील काजू बागायतदार आणि अन्य फळबागायतदारांशी चर्चा करण्यासाठी सिंधुदुर्ग दौऱ्यावर आहेत. त्यांनी बांदा (ता. सावंतवाडी) येथे बागायतदारांशी चर्चा केली. या वेळी काजू बोर्डाचे अवधुत कदम, जिल्हा फळबागायतदार संघाचे अध्यक्ष विलास सावंत, दोडामार्गचे अध्यक्ष संजय देसाई, सुरेश गावडे, आकाश नरसुले, प्रवीण परब यांच्यासह अन्य काजू, नारळ, सुपारी बागायतदार उपस्थित होते.

जिल्ह्यातील फळबागायतदारांनी, वन्यप्राण्यांचा उपद्रव वाढत असून त्यांना रोखण्यासाठी उपाययोजना करण्याची मागणी केली. फळबाग लागवड केल्यानंतर त्यातून दहा ते पंधरा वर्षे उत्पादन घेतले जाते. तरीदेखील दरवर्षी पीक पाहणीची असलेली अट रद्द करावी, काजू बीवरील आयात शुल्क वाढवावे जेणेकरून येथील काजू बीला चांगला दर मिळू शकेल, कुटीरोद्योगातून तरुणांना रोजगार उपलब्ध करण्यासाठी कमी अटी-शर्तींची योजना अमंलात आणावी, काजू बोर्डाने एखादी योजना राबविण्यापूर्वी शेतकरी प्रतिनिधींची चर्चा करावी,

यासह विविध समस्या मांडतानाच त्यांनी या समस्यांबाबत गांभीर्याने विचार होणे आवश्यक असल्याचे सांगितले. डॉ. पाटील यांनी, या सर्व विषयांबाबत सकारात्मक विचार करण्यात येईल, असे स्पष्ट केले.