Buldhana News : जिल्हाभरात अवैध वाळूविरोधात कारवाईची मोहीम सुरु असून विविध ठिकाणी अवैधपणे साठवलेला वाळूसाठा आणि वाळू वाहतूक करणाऱ्या टिप्परवर जप्तीची कारवाई केली जात आहे. जप्त केलेली वाळू त्याचठिकाणी लिलाव करून संबंधितांना देण्यात येत असून मेहकरमध्ये ११ टिप्पर जप्प करण्यात आलेले आहेत.

मेहकर शहरात एका ठिकाणी ३० ब्रास रेतीचा साठा जप्त करण्यात आला. या तालुक्यातील हिवराआश्रम येथे रस्त्यावर तीन ब्रास रेतीचा साठा रात्री जप्त करण्यात आला. मलकापूर तालुक्यात विविध ठिकाणी पथकाद्वारे ३०० ब्रासपर्यंत रेतीसाठा जप्त केला. वडोदा येथे ५० ब्रास, वाघुड गावात ६० ब्रास, मलकापूरमधील गुरुद्वाराजवळ अंदाजे ६० ब्रास साठा जप्त केला आहे. मलकापुरातीलच हाश्मीनगरमध्ये ५० ब्रास रेतीसाठा जप्त करण्यात आला.

नांदुरा खुर्द येथेही अंदाजे १२० ब्रास रेतीसाठा जप्त केला. जुने बेलाड गावठाण येथे ३००, बेलाड (ता. नांदूरा) येथे सुमारे १२५ ब्रास साठा पकडला. शेगाव तालुक्यातील कठोरा येथे पहाटेच उपविभागीय पोलिस अधिकारी, जलंब ठाणेदार, शेगावचे नायब तहसीलदार, तलाठी यांच्या पथकाने कारवाई केली.

येथेही ३०० ब्रास वाळू जप्त करण्यात आली. मेहकर तालुक्यात उपप्रादेशिक परिवहन अधिकारी यांच्या पथकासह संयुक्त मोहीम राबविण्यात आली. किनगाव जट्टू, सावरगाव तेली, भुमराळा व वझर आघाव येथील अवैधसाठा जप्त केला. सावरगाव तेली येथील नदीकाठावर नाल्यातील रस्ता जेसीबीने खोदून बंद करण्यात आला. भुमराळा येथे गावातील घरासमोर रस्त्याच्या कडेला, खुल्या जागेत असलेल्या साठ्यांची तपासणी करून सुमारे ३० ब्रास वाळूसाठा जप्त करून लिलाव करण्यात आला.

अवैध टिप्परवर कारवाई

उपप्रादेशिक परिवहन अधिकाऱ्यांच्या पथकाने मेहकर आणि लोणार तालुक्यात चार टिप्परवर कार्यवाही करून संबंधित टिप्पर पोलिस ठाण्यात जमा करण्यात आले आहे. तसेच उपविभागीय अधिकारी यांच्या विशेष मोहिमेदरम्यान नंबर प्लेट नसलेल्या सात टिप्पर वाहनांवर कारवाई करण्यात आली. यात एक लाख ३२ हजार रुपयांचा दंड वसूल करण्यात आला. ही कारवाई सहायक मोटर वाहन निरीक्षक रितेश चौधरी, सुरेखा सपकाळ, अनुजा काळमेघ, प्रियांका काळे यांनी केली.