Latur / Dharashiv News : यंदा चांगला पाऊस झाल्यामुळे दोन्ही जिल्ह्यात उसाच्या क्षेत्रात मोठी वाढ झाली आहे. उसाचे पीक बहरात असताना फेब्रुवारीच्या पहिल्या दिवसापासून उन्हाचा चटका बसत आहे. उसाला २७ ते ३५ अंश सेल्सिअसपर्यंतचे तापमान मानवते.

काही दिवसांपासून ३८ अंशांपर्यंत पारा सरकल्याचे ऊस उत्पादकांची चिंता वाढली आहे. प्रकल्पातील पाणीसाठाही कमी होत आहे. यामुळे उन्हाळ्यात सिंचनासाठी पाणी पुरेल की नाही, या भीतीने शेतकऱ्यांनी आतापासून विहिरी व बोअरच्या माध्यमातून पर्यायी सिंचन व्यवस्थेसाठी धडपड सुरू केली आहे.

मार्चअखेर बसणारे उन्हाचे चटके फेब्रुवारीअखेरीलाच बसत आहेत. द्राक्ष उत्पादकांचीही भीती वाढली आहे. भाव घसरल्यामुळे टोमॅटोकडे उत्पादकांचे दुर्लक्ष असले तरी येत्या काळात फटका टोमॅटोला बसण्याची शक्यता आहे. चांगला पाऊस झाल्यामुळे दोन्ही जिल्ह्यांत भूजलाची पातळी चांगलीच वाढली आहे. यासोबत मोठ्या प्रकल्पांमध्ये चांगला पाणीसाठा असल्याने शेतकऱ्यांनी यंदा मोठ्या प्रमाणात उसाची लागवड केली आहे.

दोन्ही जिल्ह्यांत गेल्या वर्षीच्या तुलनेत यंदा दहा हजार हेक्टरने उसाचे क्षेत्र वाढले आहे. लातूर जिल्ह्यात गेल्या वर्षी ३५ हजार ६८९ हेक्टर असलेले उसाचे क्षेत्र यंदा ४५ हजार हेक्टरपर्यंत गेले आहे. धाराशिव जिल्ह्यात गेल्या वर्षी ३१ हजार ९८१ हेक्टरवर असलेले क्षेत्र यंदा ४३ हजार ३०१ हेक्टर झाले आहे.

उन्हामुळे धरणातील पाणीसाठ्यावर परिणाम झाला असून साठ टक्केच पाणी शिल्लक आहे. यामुळे येत्या पावसाळ्यापर्यंत ऊस पिकाला शाश्‍वत पाणी उपलब्ध करण्याचे नियोजन शेतकरी करत आहेत. यातूनच काही भागात विहिरी व बोअर खोदाई सुरू आहे. अखंडित विजेसाठी सौरपंप मिळवण्याचे प्रभावी प्रयत्न सुरू आहेत.

धाराशिव जिल्ह्यात दोन हजार आठशे, तर लातूर जिल्ह्यात १२२ हेक्टरवर द्राक्षबागा आहेत. विशेषतः चाकूर तालुक्यात मोठ्या प्रमाणात टोमॅटोचे उत्पादन घेतले जाते. जिल्ह्यात ५३६ हेक्टरवर टोमॅटो असले, तर भाव घसरल्यामुळे उत्पादक नाराज आहेत. तापमान वाढीमुळे टोमॅटो व मिरचीची फुलगळ होण्याची शक्यता आहे.

शाळा सकाळच्या सत्रात कधी भरणार?

दरवर्षी कडक उन्हाचा फटका विद्यार्थ्यांना बसू नये म्हणून जिल्हा परिषदेच्या वतीने १६ मार्चपासून शाळा सकाळच्या सत्रात भरविण्यात येतात. या वर्षी फेब्रुवारीपासूनच उन्हाचे चटके बसत असल्याने शाळा एक मार्चपासूनच सकाळच्या सत्रात भरविण्याची मागणी शिक्षक संघटनांनी केली आहे. जिल्हा परिषदेने अद्याप मागणीला प्रतिसाद दिला नाही. यामुळे शाळा सकाळच्या सत्रात कधी भरणार, याकडे विद्यार्थ्यांचे लक्ष लागले आहे.